Шарқ минтақасида кеча бўлиб ўтган иккита ўйин билан тўртинчи тур ҳам тугади.
Бу мусобақада Ўзбекистондан иккита клуб иштирок этаётгани боис асосий эътибор Ғарб минтақасига қаратиб келинмоқда. 16 та жамоа иштирок этаётган мусобақа турдан турга қизимоқда. 4-тур якунларига кўра, БААнинг "Ал Айн" клуби 12 очко билан пешқадамликни давом эттиряпти. Осиё Чемпионлар Лигасининг охирги ғолиби бунгача "Ал Насср"ни 4:0, Ироқнинг "Эйр Форс" клубини 4:1, "Трактор"ни 2:1 ҳамда бу тур "Ал Иттиҳод"ни 4:1 ҳисобида мағлуб этди. Эътибор беринг-а, тўртта ўйиндан учтасида жамоа рақиблар дарвозасига тўрттадан гол урган.
Турнир жадвалида кейинги ўринларни 9 очкодан учта клуб - "Ал Ҳилол", "Истиқлол" ва "Шабаб Ал Аҳли" эгаллаб турибди. 16та жамоадан 8таси кейинги босқичга йўл олишини ҳисобга олсак, "Нефтчи" 4 очко билан 9-ўринда, "Пахтакор" эса 2 очко билан 14-ўринда бормоқда. Фарғоналикларда ҳозирча бир ғалаба, бир дуранг ва икки мағлубият бор. "Пахтакор" эса икки бор дуранг қайд этиб, иккита учрашувда имкониятни бой берди.
Элит ОЧЛнинг Шарқ минтақасида нима гап? Айтиш мумкинки, бу минтақада ҳам ўйинлар давом этяпти ва биз доим кузатмаганимиз учун назаримизда жимгина кетаётгандек. Одатда Шарқ минтақасини баҳор ойларига бориб ҳар иккала минтақа қўшилганидан кейин чорак финалдан кузата бошлаймиз (Агар шунда ҳам бизнинг жамоалар чорак финалга етиб борса).
Хуллас, жимгина давом этаётган Шарқ минтақаси Элит ОЧЛ ҳақида бугун бироз фикр юритамиз. Бунда ҳам 16та жамоа иштирок этяпти ва 8та жамоа кейинги босқичга чиқади. Айтиб ўтганимиздек, кеча бўлиб ўтган иккита ўйин билан тўртинчи турга якун ясалди.
Иштирокчи жамоалар
Ушбу мусобақада еттита давлат вакиллари баҳс олиб боряпти. Энг кўп жамоа Япониядан - 5та. Шунингдек, Жанубий Корея билан Таиланддан учтадан жамоа қатнашяпти. Хитойнинг икки клуби, Австралия, Вьетнам ва Малайзиядан биттадан жамоа Элит ОЧЛ ўйинларида ўз омадини синаб кўрмоқда.
Япония (5та) - "Виссел Кобе", "Кашима Антлерс", "Гамба Осака", "Кашива Рейсол", "Кйото Санга".
Жанубий Корея (3та) - "Чонбук Моторс", "Теджон Ситизен", "Поханг Стилерс".
Таиланд (3та) - "Порт", "Бурирам Юнайтед", "Ратчабури".
Хитой (2та) - "Бейжинг Гоан", "Шанхай Порт".
Австралия (1та) - "Ньюкасл Жетс"
Малайзия (1та) - "Жоҳор Дарул Таъзим"
Вьетнам (1та) - "Конг Ан Ха Ной"
Турнир жадвали
Мусобақа жадвалида Япониянинг "Виссел Кобе" клуби пешқадамликни қўлга олган. Бу жамоа ҳисобида 12 очко бор: тўрт ўйин, тўрт ғалаба. Умуман олганда қаторасига тўртта ўрин япон клубларига тегишли: "Виссел Кобе", "Кашима Антлерс", "Гамба Осака", "Кашива Рейсол".
Сўнгги йилларда Осиёда ном чиқариб олган Малайзиянинг "Жоҳор Дарул Таъзим" клуби ҳам мусобақада ўзини кўрсатиб, 7-ўринни эгаллаб турибди. Таиланднинг ҳар учала клуби ҳозирча ўзини кўрсатгани йўқ. Шунингдек, Австралиянинг ягона вакили "Ньюкасл Жетс" ҳозирча тўртта учрашувнинг барчасида имкониятни бой берди.
Яқин тарихга назар
Осиё чемпионлар Лигаси Элит деб номланмасидан олдин 2022 йил Япониянинг "Урава Редс" клуби ғолибликни қўлга киритганди. 2023 йил эскича форматдаги ОЧЛнинг охирги мавсуми ўтказилиб, БААнинг "Ал Айн" клуби зафар қучди. Финалда "Йокогама Маринос" клуби мағлуб этилган.
Охирги икки мавсумдан бери Элит ОЧЛ ўтказиб келинаётган бўлса, ҳар иккисида Саудия Арабистонининг "Ал Аҳли" клуби чемпион бўлди. Биринчи финалда яна Япония клуби ўйнаган: "Кавасаки Фронтале" ва иккинчи финалда ҳам япон клуби: "Мачида Зелвия".
Кўриниб турибдики, Япония клублари шовқин кўтармасдан жимгина одимлайди. Улар Саудия жамоаларига ўхшаб шов-шувли трансфер қилмаяпти, ўзига хос ажойиб мактаби бор, ўз одатларига содиқ қолган ҳолда турли мусобақалар финалига етиб келади. Легионерлари ҳам топ даражадаги юлдузлар эмас. Асосан маҳаллий ўйинчиларга таянган ҳолда футбол ўйнаш орқали титулларга эга чиқишга ҳаракат қилишади. Жимгина давом этаётган Шарқ Элит Лигасида бу мавсум ҳам бирорта япон клуби финалда ўйнаса ажаб эмас.
Хайрулла Холиқов
