Жеррард Салоҳ ҳақида: "Автобус тагига ташлашди" қабилидаги гаплар нотўғри, аммо ҳеч ким мукаммал эмас"

Эслатиб ўтамиз, "Ливерпуль" вингери АПЛ доирасидаги "Лидс"га қарши ўйинни (3:3) тўлиқ захирада ўтказди, у олдинги иккита баҳсни ҳам захира ўриндиғида бошлаган эди. Учрашувдан сўнг Салоҳ клуб ва бош мураббий Арне Слотни танқид қилди: "Мен клуб учун шунча иш қилдим, улар эса мени "автобус тагига итаришди". Африка Кубоги олдидан хайрлашаман – кейин нима бўлишини билмайман". 33 ёшли мисрлик футболчи ЕЧЛ доирасидаги "Интер"га қарши баҳс (1:0) қайдномасига киритилмади.

"У ўйнамаётганидан қаттиқ хафа эканлиги кўриниб турибди ва мен буни ҳурмат қиламан. У жамоага ёрдам беришни истаётгани аниқ.

Уни "автобус тагига ташлашгани" ҳақидаги гаплар – бу нотўғри. Бундан бироз чекиниш, мураббий билан гаплашиб олиш керак. Виржил ван Дейк: "Буни қандай ҳал қиламиз?", деб сўраши лозим. Масала клуб ёки жамоада эмас, гап кўпроқ мухлисларда.

Мен бунга ўхшаш ҳолатни кўрганман ва [Луис] Суарес Брендан [Рожерс] билан шахсан жанжаллашиб қолганида буни бошдан кечирганман. Ўзим ҳам бундан ўтганман. Мен "Манчестер Юнайтед"га қарши ўйинда ўзимни Салоҳ каби тутганман ва 30 сония ичида қизил карточка олганман.

Шундай экан, ҳеч ким мукаммал эмас ва барча ўйинчиларда ҳиссий портлашлар бўлиб туради. Ўйлашимча, вақт ўтиб, ҳаммаси тинчлангач, Мо шундай дейди: "Мен бу гапни айтмаслигим керак эди. Балки мен бироз ҳиссиётга берилгандирман ва шошқалоқлик қилгандирман".

Якунда "Ливерпуль"га Мо Салоҳ яна яхши ўйнаши ва гол уриши учун керак, чунки у энг яхши ўйинчи ва тўпурар, у жамоага ушбу вазиятдан чиқиб кетишга ёрдам беради.

Агар вазият шундайлигича қолса, бу биз кўриб турганимиздан кўра анча жиддийроқ тус олади", – деди Жеррард "TNT Sports" эфирида.