"Жаҳон чемпионатидаги муваффақиятсизликдан сўнг, бош мураббий сифатида мен ҳам жавобгарман. Барча ҳолатларни кўриб чиқиб, FAČR президенти Давид Трундга истеъфога чиқишимни таклиф қилишга қарор қилдим. Ўзаро муҳокама ва маслаҳатлашувлардан сўнг президент таклифимни қабул қилди. Натижада, миллий жамоадаги фаолиятим якунланди.
Бу қарорга келишимга менга қарши тўқима гаплар асосида олиб борилган медиакампания ҳам сабаб бўлди. Бундай муҳитда Чехия миллий терма жамоасидаги ишим ҳеч қандай маъно касб этмасди.
Раис Давид Трунд ва FAČR ижроия қўмитасига менга билдирган ишончи учун миннатдорчилик билдираман. Шунингдек, ҳамкорлик учун Павел Недведга, лойиҳани амалга оширишдаги жамоа аъзоларига, Чехия футбол ассоциацияси ходимларига ва энг аввало, футболчиларга катта раҳмат айтаман. Чехия терма жамоасини бошқариш мен учун катта шараф эди.
Жаҳон чемпионатида орттирилган тажрибадан сўнг, миллий жамоа билан ишни давом эттириш бўйича бор бўлган аниқ режаларимни амалга ошира олмаётганимдан афсусдаман.
Мухлисларга ҳам катта раҳмат айтмоқчиман. Саралаш босқичи давомида ва Жаҳон чемпионатининг ўзида уларнинг қўллаб-қувватлаши ақлбовар қилмас даражада эди, мен буни ҳеч қачон унутмайман.
Чехия миллий терма жамоасига ва менинг ворисимга кейинги фаолиятида муваффақиятлар тилайман. Ҳар бир чехиялик футбол мухлиси каби мен ҳам улар учун мухлислик қиламан", — дея Коубекнинг сўзларидан иқтибос келтирмоқда Чехия терма жамоаси матбуот хизмати.
Чехия терма жамоаси "А" гуруҳида учта ўйиндан сўнг битта очко жамғариб, 2:6 тўплар нисбати билан тўртинчи ўринни эгаллади.
