Ўйин ва мухлислар қўллаб-қувватлови ҳақида
"Барчани ғалаба билан табриклайман. Яхши ўйин ўтказдик, ҳозир ҳеч бир баҳс осон кечмаяпти. Учрашув олдидан мени энг кўп ўйлантирган жиҳат футболчиларни руҳий томондан тайёрлаш эди, чунки бундай ўйинларга жамоани психологик жиҳатдан шайлаш оғир кечади. Йигитларга кўплаб тушунтиришлар бердик, йиғилишлар ўтказдик ва улар майдонда ўзларининг профессионал даражаларини яна бир бор намойиш этишди. Бунинг учун шогирдларимга ҳамда совуқ об-ҳавога қарамай стадионга келиб бизни қўллаб-қувватлаган барча мухлисларимизга миннатдорчилик билдираман", — деди Исмоилов.
Таркибдаги ротациялар ва ЧЛ баҳслари
"Таркибимизда футболчилар кўп ва бир қанча ўйинчилар жароҳатдан тикланиб, сафга қайтишмоқда. Бугун узоқ муддатли танаффусдан сўнг уларга кўпроқ ўйин амалиёти бердик. Мавсум якунланиб бораётган бўлса-да, биз учун ҳали тугагани йўқ — олдинда ЧЛда иккита муҳим учрашувимиз бор. Футболчиларни ўша баҳсларга соғлом ва жароҳатларсиз етиб боришини таъминлаш жуда муҳим. Шу боис ҳар бир ўйинда ротация қилишга мажбурмиз, ҳеч бўлмаганда битта ўйинчи ўзгармоқда ва бу жараён кейинги беллашувларда ҳам давом этади".
Катанец ва Кападзе билан қиёслашлар хусусида
Журналистлар томонидан Россия ОАВда Ислом Исмоилов ва Тимур Кападзени Ўзбекистон миллий терма жамоаси устозидан кучлироқ дея эътироф этилгани ҳақида берилган саволга мутахассис қуйидагича жавоб қайтарди:
"Бундай таъриф учун раҳмат, лекин мен ҳар бир мураббийни ҳурмат қиламан. Ҳамманинг ўзига яраша салоҳияти бор, у эса ҳозирда Ўзбекистон миллий терма жамоаси бош мураббийи. Мен ўзимни ҳеч қачон қайсидир мутахассисдан кучли деб ҳисобламайман ва устун қўймайман. Футболда ҳали ўрганишим керак бўлган жиҳатлар жуда кўп".
Терма жамоага фақат бир нафар футболчи чақирилгани ҳақида
"Албатта, жамоамиздан кўплаб ўйинчилар терма жамоага жалб этилса, бундан фақат хурсанд бўламиз. Бироқ ҳозир фақат бир нафар футболчимиз чақирилган. Бу бир томондан фойдамизга ишлайди, чунки таркиб жамоа билан бирга қолади ва машғулот жараёнида узилиш юзага келмайди. Сўнгги пайтларда ФИФА кунларидан кейинги қайтиш биз учун бироз оғир кечаётган эди, шу сабабли бу ҳолат ҳозирги вазиятда биз учун қулай".
"Бунёдкор" ўйини ва баҳснинг бориши
"Икки жамоа икки хил ҳолатда: бири чемпионлик учун, иккинчиси эса лигада қолиш учун курашмоқда. "Бунёдкор"да ўз касбини ҳурмат қиладиган, ақлли ва истиқболли мураббий ишламоқда, у билан бирга ўқиганмиз. Бугун ҳам жамоа ўйинида мураббийнинг имзоси кўриниб турди. Улар кўпроқ тўп назоратига эътибор қаратишди ва прессинг қўллашга уринишди, аммо бу баъзи вазиятларда уларнинг фойдасига, айрим ҳолларда эса зарарига ишлади.
Бизга келсак, мавсум сўнгида футболчилар жисмоний эмас, балки руҳий томондан кўпроқ чарчашмоқда. Чемпионлик яқинлашгани сайин хато қилишдан қўрқиш ҳисси сезиляпти. Баҳснинг дастлабки 20-25 дақиқасини яхши ўтказиб, иккита чиройли гол урдик, кейин эса ўйин ритмини йўқотиб, оддий вазиятларда кўп хатоларга йўл қўйдик. Танаффусда керакли кўрсатмаларни бердик ва иккинчи бўлим бошида яна ташаббусни қўлга олиб, тезкор голлар эвазига ғалабани таъминладик".
Чемпионлик имкониятлари
"Чемпионликка неча фоизга яқинлашдик? Қарийб 90 фоизга. Олдинда яна учта ўйин бор ва мақсадимиз уларнинг барчасида ғалаба қозониш. Кўплаб ОАВ бизни аллақачон чемпион деб атамоқда, лекин мен айтаманки, биз ҳали чемпион эмасмиз. Қачонки барчаси расман ҳал бўлса, шундагина эркин нафас олишимиз мумкин. Унгача эса на футболчилар, на мураббийлар штабининг бўшашишга ҳаққи бор", — дея сўзларини якунлади Исмоилов.
