– Авваламбор, ассалому алайкум. Бугунги ғалаба билан "Андижон" халқини, қолаверса, шу ерга келган мухлисларимизни табриклайман ва шу ерга қадар келган мухлисларимизга каттакон раҳмат айтамиз. Ўйинга келадиган бўлсак, ўйин оғир кечишини билган эдик. Бизда ҳозир озгина руҳий тушкунлик бор эди, сабаби охирги ўйинларда омад етишмаётган эди. Бугун, Худога шукур, шу анъанага чек қўйиб, ғалабага эришдик.
Футболчиларимиз ўйинни назорат қилишди, яхши узатмалар билан чиқиб кетишга ҳаракат қилдик ва якунда ғалабага эришдик.
– "Андижон" жамоаси чемпионатнинг охирги учта ўйинида омадсиз ҳаракат қилди ва, табиийки, бу кубок ўйини ҳал қилувчи аҳамиятга эга эди. Шуни ҳисобга олган ҳолда, футболчиларнинг руҳий ҳолатини яхшилаш ва уларга мотивация бериш мураббий сифатида сизга қанақадир қўшимча муаммо туғдирмадими?
– Футболчиларнинг ўзига ишончини қайтариш, очиғи, қийин бўлди, лекин биз бошида айтганмиз, яъни натижа учун биз жавобгармиз. Бироқ бугун ҳам биз ўз фалсафамиздан, ўзимизнинг ўйинимиздан чиқмаган ҳолда, тўпни назорат қилиб, ҳужум ташкил қилдик.
Қандай натижа бўлишидан қатъий назар, биз ўз ўйинимизни ўйнашга ҳаракат қилдик. Фақат охирида концентрацияни йўқотмаслик бўйича уларга тушунча бергандик. Худога шукур, йигитлар яхши ҳаракат қилишди, охиригача курашишди, майдонда ҳар бир қарич ер учун курашишди, бугун бошқача иштиёқ билан тушишди, уларга каттакон раҳмат айтамиз.
– Боаке бугун яхши ҳаракат қилди ва иккинчи голга муаллифлик қилди, лекин ўйин охирида қизил карточка олди. Умуман, ҳужумчининг ушбу вазиятдаги ҳаракатини қандай изоҳлайсиз?
– Энди бу вазиятни кўпроқ ҳакам баҳолайди. Шунинг учун, ҳакам шунақа қарор қабул қилдими, уларнинг ҳақ қарорига аралаша олмаймиз.
– Мавсум бошида чап қанотда Маҳмуджон Маҳамаджонов ҳаракат қилди. Бироқ ёзда футболчининг жамоадан кетиши чап қанот ҳимоясига жиддий таъсир кўрсатди. Бу муаммоларга қўшимча ечимлар борми ёки умуман муаммо йўқми? Нима деб ўйлайсиз?
– Маҳамаджонов мавсум ўртасида жамоани тарк этди, шунинг учун биз унинг ўрнига ўйинчи ололмадик. Агар олдиндан билганимизда, ҳаракат қилиб, чап қанотга ҳимоячи олган бўлардик. Ҳозирда айнан чап қанот ҳимоячимиз йўқ. Иложи йўқлигидан биз ўнг қанот ўйинчиларимизни чап қанотда ўйнатяпмиз. Бизда ҳозир ҳеч қанақа ечим йўқ, ана шу ўзимизнинг бор ўйинчилардан қўлдан келганча ечим топишга ҳаракат қиляпмиз.
