— Ислом ака, ўйин ҳақида дастлабки фикрларингиз...
— Авваламбор ассалому алайкум. Бугун жуда ҳам аламли мағлубият бўлди, бунинг учун мухлисларимиздан узр сўрайман. Ўйинга келадиган бўлсак, "Насаф" жамоаси яхши шаклланган ва тезкор қарши ҳужумлардан фойдаланишини билардик. Шунга яраша тайёргарлик кўргандик, яъни ўз схемамизни озгина ўзгартиргандик. Биринчи таймнинг бошида бу иш берди. Кўпроқ ўз ўйинимиздан кечган ҳолда, натижа учун ўйнашга ҳаракат қилдик. Лекин иккинчи таймда голлар ўтказиб юборганимиздан кейин яна ўз схемамизга ўтишга қарор қилдик. Якунда шу қарши ҳужумлардан кўпроқ гол ўтказиб юбордик.
— Бугунги учрашувда жамоа 5 та ҳимоячи билан ўйинни бошлади. Ўз майдонингизда 5 та ҳимоячи билан ўйинни бошлашга нима сабаб бўлди?
— Асосан олдинги ўйинларимизга ҳам эътибор берган бўлсангиз, бу ерда ҳимоявий эмас, яъни ҳимояда 5 та бўлади, лекин ҳужумга ўтганда ўз-ўзидан алмашиб кетадиган схема эди. Яъни ўрта чизиқда 4 та ўйинчи кўпаярди, олди чизиқда 3-2-5 схемасига ўтардик. Шунақа трансформация бўладиган система эди. Асосан қарши ҳужумни қўйиб юбормаслик учун қилинган нарса эди. Лекин айтганимдек, бугунги кунгача ҳар битта мураббийлик соҳасида ўтказаётган куним мен учун улкан тажриба бўляпти. Лекин бир нарса — бу ер тажриба тўплайдиган жой эмаслигини биламиз, бу ерга тажрибали мураббийлар керак. Шунинг учун Андижон халқимиз ва муҳлисларимиз бундай натижаларга лойиқ эмас. Рахбариятимиз қанақа қарор қабул қилишидан қатъи назар, буни қабул қиламиз. Айтганимиздек, ҳар битта кунимиз биз учун тажриба бўляпти.
— Охирги ўйинларда жамоада кўплаб ротациялар бўляпти, барқарор таркиб йўқ. Бундай ҳолатга нима сабаб бўляпти?
— Жамоани бошидан қабул қилиб олганимиздан кейин, айтганингиздек, соғлом муҳит ва соғлом рақобатни йўлга қўйгандик. Бошида бу яхши кетаётган эди, яхши иш бераётганди. Шунинг учун шу нарсада ишлаб келаётгандик. Схемамизга, ўйинга ва рақибга қараб туриб ҳар битта ўйинимизда шунақа ўзгартиришлар қилаётгандик. Бу ўз фойдасини бераётган эди, баъзида шунақа зиёнига ишлашини ҳам ўргандик.
— Жамоада молиявий қийинчиликлар йўқ, маошлар ўз вақтида бериляпти. Лекин натижа йўқ. Бу нима билан боғлиқ, жамоага нима етишмаяпти?
— Йўқ, бу асосан молиявий нарса билан боғлиқ эмас. Кейин футболчиларимиз ўйнамаяпти деёлмаймиз, чунки барибир ўзини даражасида борини бериб ҳаракат қилишяпти, ўйнашяпти. Футболчиларга ҳеч қанақа эътироз йўқ. Камчиликларни ўзимиз кўриб чиқамиз. Балким қаердадир мураббийлар — биз адашаётгандирмиз уларни ўйнатиш ва тайёрлашда.
— Ҳозир ФИФА кунлари бошланмоқда, танаффусдан қандай фойдаланиш режалаштирилган?
— Ҳозир 3-4 кунга дам берамиз йигитларимизга — озгина оиласи билан бўлиб, футболдан чалғишлари учун. 25-санада ўз қароргоҳимизда тўпланиб, тайёргарликни давом эттирамиз. Хориж сафари йўқ, барчаси шу ерда бўлади.
