— Бугунги учрашув ҳақидаги фикрингиз...
— Ғалаба ва ярим финал йўлланмаси қўлга киритилганлиги билан клуб раҳбариятини, мухлисларни, барчани табриклайман. Ўйин қизиқарли бўлди. “Пахтакор”га қарши кечган баҳс биздан кўп куч ва ҳиссий энергияни олди. Шунинг учун бугунги беллашувда аввалги ўйинларда бироз камроқ иштирок этган футболчиларга майдонга тушиш имкониятини бердик. Умуман олганда, рақибга ҳам муносиб баҳо бериш керак. Улар анча яхши, жипслашган ҳолда ҳимояланишди. Қизиқарли жамоа. Ўйлайманки, чемпионат ҳамда Про лигада бундай ёш жамоалар қанчалик кўп пайдо бўлса, бу Ўзбекистон футболи ривожи учун шунчалик катта фойда беради.
Бизга осон бўлмади. “Пахтакор” билан бўлган ўйиндан кейинги чарчоқ сезилди. Умуман олганда, натижа учун ўйнадик. Биз учун ярим финалга чиқиш муҳим эди ва буни амалга ошириш учун қўлимиздан келган барча ишни қилдик.
— Бугунги беллашувда дарвозабон Шукрон Йўлдошев ишончли ҳаракат қилди. Унга Суперлига ўйинларида ҳам ишонч билдириши мумкинми?
— Машғулотларда ҳар бир футболчида ўзини кўрсатиш имконияти бор. Бизда ишонч билдириладиган, жамоа учун жуда муҳим бўлган ўйинчилар етарли. Ҳар бир футболчини қадрлаймиз. Шу сабабли, ҳар қандай ҳолат юз бериши, исталган футболчи ўйинларда майдонга тушиши мумкин. Ким кўпроқ ҳаракат қилса ва ўйнашга муносиб бўлса, ўша футболчи асосий таркибда майдонга тушади.
— Бугун майдонда ҳаракат қилган футболчилар ишончни оқлашдими?
— Бугунги учрашувда “Пахтакор”га қарши кечган ўйинда майдонда камроқ ҳаракат қилган футболчилар майдонга тушишди. Чунки яна бир бор таъкидлайман, ўша учрашув жуда оғир кечди, ҳиссий зўриқиш ҳам кўп бўлди. Бундан ташқари, бугунги баҳсгача бўлган вақт оралиғи ҳам қисқа эди. Шу сабабли, бугун таркибда катта ротация амалга оширилди.
— Алекс Фернандес нима учун майдонга тушмаяпти?
— Алекс жароҳат олган. Тахминан бир ҳафта ёки бир ярим ҳафта олдин операция қилинди. У Тошкентда жарроҳлик амалиётини ўтказди ҳамда ҳозир тикланиш жараёнини бошдан кечирмоқда. Қанчалик тез сафга қайтишини эса тиббий штабдан аниқлаштириш керак. Худо хоҳласа, тезроқ соғайиб, жамоамизга қайтсин, ўз ўйини билан бизни хурсанд қилиб, жамоага ёрдам берсин.
— “Навбаҳор” жамоасини сўнгги икки беллашувда сиз бошқардингиз ҳамда мазкур ўйинларда стадион мухлисларга тўла бўлди. Бундай муҳитда футболчилар билан мулоқот уюштириш, уларга кўрсатма бериш қийинчилиик туғдирмадими?
— Стадиондаги муҳит шунчаки ажойиб! Бу ердаги атмосфера ақлбовар қилмас даражада. Аввалги сафар ҳам айтганман, бундай муҳит футболчиларга ёрдам беради ва бу жуда яхши.
Албатта, бундай шовқинда бир-бирингизни эшитиш қийин, лекин трибуналар бўм-бўш бўлганидан кўра, шундай бўлгани яхши. Ишқибозларга эса стадионга ташриф буюриб, жамоани қўллаб-қувватлаётганлари учун катта раҳмат айтаман. Ҳатто нимадир ўхшамай қолганида ҳам улар бизни қўллаб-қувватлашда давом этишмоқда. Бу жуда ажойиб! Бунинг учун улардан миннатдорман.
Мухлисларнинг қўллаб-қувватлашлари ғалабаларимизга ҳам ёрдам беради. Ҳечқиси йўқ, баъзан уларнинг овозларини эшитиш ҳам қийин бўлади.
“Навбаҳор” ПФК матбуот хизмати.
