– Бугунги учрашув ҳақидаги фикрларингиз қандай?
– Бугунги ўйинда дурангга эришганимиздан хурсандмиз. Сабаби – биринчи бўлим жуда ҳам оғир кечди. Йигитларимиз уч-тўрт кун олдин кубок ўйинида майдонга тушиб, кўп куч йўқотгани ҳисобига, тикланиш жараёнида кўпчилик ўйинчиларимизга жисмоний тетиклик етишмагандек туюлди. Қолаверса, хоҳлаймизми-йўқми, иккала жамоа ҳам турнир жадвалида бир хил ўринда турибди. Иккаламизга ҳам уч очко жуда зарур эди. Шунинг учун футболчиларимиз биринчи бўлимда эҳтиёткорлик билан ўйнашга ҳаракат қилишди, аммо бу унчалик ўхшамади. Биринчи бўлимда кўп яккакурашларни ютқазиб қўйдик. Яхшиямки, иккинчи бўлимда ўзларига келиб, ташаббусни ўз қўлларига олишди ва тўп назоратини ўрнатганимиздан сўнг, хавфли ҳужумларимиз бошланди.
– Бугун иккала жамоа ҳам худди ҳеч қандай мотивацияга эга эмасдек ўйнади. "Динамо"нинг бундай ўйинидан ҳайрон қолмадим, чунки улар учун мавсум деярли якунланган, лигада қолиш имконияти йўқ ҳисоби. Лекин "Андижон"да кубок ярим финалига чиқиш орқали яхшигина мотивация пайдо бўлган эди. Бироқ жамоа кубок ярим финалчисидек ҳаракат қилмади. Уларда худди "чемпионатда пастга ҳам тушиб кетмаймиз, юқорига ҳам чиқа олмаймиз" деган кайфият бордек туюлдими?
– Йўқ, ундай эмас. Юқорида таъкидлаганимдек, уч-тўрт кун олдин Жиззахда ўйнаганимиз сабабли, барибир футболчиларимизда чарчоқ ҳисси сезилди. Жисмоний тетиклик йўқлиги ҳисобига уларнинг ҳаракатлари унчалик яхши чиқмади. Қолаверса, айтганимдек, қизил зонага тушиб кетмаслик учун бугун уч очко ҳар иккала жамоага ҳам зарур эди. Шунинг учун биринчи бўлимда эҳтиёткорлик билан ўйнадик ва натижада ўйинимиз унчалик қовушмади.
– Ниҳоят, мағлубиятлар сериясига барҳам берилди. Абрамов учрашув унга ёқмаганини айтди. Сизга-чи, ўйин маъқул бўлдими?
– Умумий қилиб айтганда, бугунги ўйинда бир очко олдик. Очиқ айтаман, биринчи бўлимдаги ўйинимиз ўзимга ҳам маъқул келмади. Аммо иккинчи бўлимдан кўнглим тўлди. Гол ўтказиб юборган бўлсак-да, ўзимизда куч топиб, ҳисобни тенглаштира олдик. Шунинг учун, қўлга киритилган бир очкодан кўнглим тўлди, десам бўлаверади.
– Ўйин айнан гол урилгандан кейин очилиб кетганини қандай изоҳлайсиз? Абрамов киритилган голни ва умуман ўйиндаги ҳолатларни яккакурашлардаги индивидуал хатолар билан изоҳлади. Сиз "Андижон"нинг умумий ўйинини қандай баҳолайсиз?
– Йигитлар астойдил ҳаракат қилишди, бунинг учун улардан миннатдорман.
– Демак, сўнгги дақиқаларда ўйинни қутқариб қолишгани – бу характерми?
– Ҳа, албатта. Бу – характер. Йигитларимиз ўзларининг иродали характерларини муносиб тарзда кўрсата олишди.
– Кубок баҳсидан сўнг таркибда ротация қилишга мажбур бўлганингизни ва мотивация масаласини юқорида айтиб ўтдингиз. Бугун беш нафар асосий ўйинчидан фойдалана олмадингиз. Шундай вазиятда майдонга тушган футболчиларнинг, айниқса, етакчилар йўқлигида ўйинга қўшилишга мажбур бўлганларнинг жисмоний ва функционал ҳолатини қандай баҳолайсиз?
– Жароҳатлар кўпайиб кетгани сабабли кўплаб ўзгаришлар қилишга мажбур бўляпмиз. Аммо бунинг эвазига ёшларга имконият беряпмиз. Улар ўзларини ёмон кўрсатишмаяпти. Захирадан майдонга тушиб, ўйинни кучайтириб беришмоқда. Ўйлайманки, ёшларимиз ишончни оқлашмоқда.
– Кейинги турда "Навбаҳор" билан, ундан кейин эса "Локомотив" билан ўйнайсизлар. Олдинда иккита кучли рақиб турибди. Умуман олганда, бу ўйинлардан қандай натижалар кутяпсиз? Тайёргарлик кўриш жараёни ҳақида ҳам гапириб ўтсангиз.
– Рақиб қандай жамоа бўлишидан қатъи назар, биз ўз ўйин услубимиздан чекинмаган ҳолда тайёргарлик кўрамиз. Ҳужумкор футбол, тўпни назорат қилиш ва ҳоказо. Чемпионатдаги ҳар бир жамоа билан ўйнашимиз шарт. Шунинг учун, ўз фалсафамизга содиқ қолган ҳолда, барча рақибларга қарши жиддий тайёргарлик кўрамиз.
– Мавсум бошида "Андижон" катта харажатлар қилди ва номдор мураббийни олиб келди. Лекин бу ўзини оқламагач, гувоҳи бўлдикки, "Андижон" тизимида ҳам яхши мураббий бор экан. Жаҳон чемпионатигача бўлган ўйинларга эътибор қаратсак, жамоа сизнинг қўл остингизда жуда яхши ҳаракат қилди. Ҳозирги кунда қўлга киритилган очколарнинг аксарияти ҳам ўша даврга тўғри келади. Бироқ кейинчалик бироз пасайиш кузатилди ва икки марта истеъфо сўраганингизни айтдингиз. Аммо раҳбарият буни қабул қилмади. Ҳозир эса сизларда кубокни ютиш имконияти пайдо бўлди. Финалга чиқсангиз, нариги томонда "Андижон"ни мағлуб этган рақиб кутиб турибди. Бу ўзингиз учун ҳам қандайдир қўшимча мотивация эмасми? Мураббий сифатида кубокни ютиш орқали салоҳиятингизни тўла намойиш этиш имконияти юзага келади-ку?
– Албатта, ҳар бир ўйин – бу мотивация. Ҳар бир ўйин – янги синов ва янги тажриба. Шунинг учун, таъкидлаганимдек, ҳар бир ўтаётган кунимиз биз учун катта тажриба мактаби бўлмоқда. Ўрганяпмиз, хатоларимизни таҳлил қилиб, тўғирлашга ҳаракат қиляпмиз. Худо хоҳласа, келгусида тажрибамизни ва иш фаолиятимизни янада яхшилаб борамиз, деб ўйлайман.
