Балогун ЖЧ-2026 1/16 финалида Босния ва Герцеговинага қарши кечган баҳсда (2:0) Тарик Мухаремовичнинг оёқ тўпига босиб олгани учун ВАР текширувидан сўнг қизил карточка олганди. Кейинчалик Балогуннинг бир ўйинлик дисквалификацияси бир йиллик синов муддати билан тўхтатиб турилди – АҚШ ҳужумчиси 1/8 финалда Бельгияга қарши майдонга тушиши мумкин эди.
Дональд Трамп Жанни Инфантинога икки марта – Балогун четлатилганидан сўнг ва дисквалификация тўхтатилганидан кейин қўнғироқ қилгани ҳақида хабар берилганди. Кейинчалик АҚШ президенти ФИФА раҳбари билан гаплашганини тасдиқлади.
"Мен Фоларин Балогуннинг дисквалификацияси юзасидан ФИФА мустақил интизом қўмитасининг қарорига нисбатан билдирилган жамоатчилик фикрлари билан танишдим ва ФИФА бошқарувининг асосий тамойилини яна бир бор таъкидламоқчиман.
ФИФА суд органлари мустақил. Улар автоном равишда ҳаракат қилади, ФИФА интизом кодексини қўллайди ва мавжуд қоидалар ҳамда аниқ фактлар асосида ишларни кўриб чиқади. Уларнинг мустақиллиги футболга бўлган ишонч ва унинг яхлитлиги учун жуда муҳим ва бунга доимо риоя қилиниши керак.
Ҳа, мен АҚШ президенти билан жаҳон чемпионатига оид мавзуларни мунтазам муҳокама қиламан ва Дональд Трамп дарҳақиқат менга ушбу масалада қўнғироқ қилди. Худди шундай, менга бутун дунё бўйлаб давлат раҳбарлари, расмийлар, футбол соҳасидаги манфаатдор томонлар ва бизнес раҳбарлари кўплаб масалалар бўйича қўнғироқ қилишади. Суҳбатимиз давомида мен ҳозирда ФИФАнинг мустақил суд органлари иштирокида суд жараёни кетаётганини ва бу иш бўйича қарор белгиланган тартибда ваколатли органлар томонидан қабул қилинишини тушунтирдим. ФИФА тизими айнан шундай ишлайди ва мен бу тамойилга доимо амал қиламан.
Мен ФИФА Интизом қўмитасининг қарорлари эълон қилинганда уларни ўқиб чиқаман. Баъзида улар мени ҳайрон қолдиради. Баъзида мен уларга қўшиламан, баъзида эса йўқ. Бироқ, мен бу қарорларни ва уларни қабул қилувчи органларнинг автономиясини доимо ҳурмат қиламан. Бирор қарор бизга шахсан ёқадими ёки йўқ, бу муҳим эмас. Мустақил институтлар ва қонун устуворлигини ҳурмат қилиш – бу мусобақаларимиз ҳалоллигини ва ФИФАга бўлган ишончни ҳимоя қилувчи нарсадир", – дея Инфантинонинг сўзларини келтиради журналист Бен Жейкобс.
