"Менимча, агар сиз ўйинчини аллақачон чақирган, у 1 ойдан бери терма жамоа ихтиёрида бўлса, барча тиббий кўриклардан ўтган, шунча вақт жамоа билан бирга — Тошкентда, кейин Америкада шуғулланган бўлса, 1 июнга келиб уни 26 кишилик рўйхатда бўлиши керак деб ҳисоблаб, бу ҳақда эълон қилган бўлсангиз, уни Жаҳон чемпионати учун расман рўйхатдан ўтказган бўлсангиз-у, энди "тўсатдан" унда умуртқа поғонаси чурраси (грижа) аниқланганини айтиш — бу шунчаки нопрофессионаллик ва футболчига нисбатан адолатсизлик. Олдин "грижа" йўқмиди?
Умуртқа поғонаси чурраси тўсатдан пайдо бўлиб қолмайди, ЖЧга 1 ҳафта қолганида. Бундан ташқари, "грижа" Ўзбекистондан ташқари кўплаб футболчиларда бор. У "шу" грижа билан ЖЧга чиқиш учун бўлган ўйинларда майдонга тушиб, соғлиғини хавф остига қўйган ва бизга керак бўлган пайтда ундан фойдаланганмиз. Қатарда Шома ва Отабек жароҳат олганда, у касал ҳолида, иситма билан майдонга тушганда ва биз билан Лаосга учиб борганда, кейин эса ҳолсизликдан ўрнидан тура олмай 2 кун хонасидан чиқмаганида, биз унга овқат ташигандик. Шунга қарамай, биз ундан фойдаланганмиз ва ўшанда ҳеч ким "грижа" ҳақида эсламаганди, чунки бизга натижа керак эди. Энди эса Жаҳон чемпионати бошланишига 1 ҳафта қолганида, биз "тўсатдан" унда "грижа" борлигини аниқладик.
У "грижа"ни узоқ йиллар давомида терма жамоамиз шаънини ҳимоя қилиб орттирган. Энди эса у кераксиз бўлиб қолди. Жуда хунук ҳолат", – деди Игамбердиев.
Аввалроқ ЎФА Машариповнинг ҳолати бўйича расмий баёнот берган эди.
