Ҳамиджон Актамов: “Қимматли очколарни йўқотдик”
10 сен 2016 10:52
Янгиликлар

Ҳамиджон Актамов: “Қимматли очколарни йўқотдик”

Олий лига йигирма биринчи тур доирасида “Қизилқум” — “Қўқон-1912” жамоалари учрашуви (1:1) ниҳоясига етгач, матбуот анжумани иккинчи қисмида мезбонлар бош менежери Ҳамиджон Актамов қатнашди.

- Бугунги учрашувда ғалаба қозониб, мухлисларимизга ҳайит байрамига муносиб совға тайёрламоқчи эдик, — дея сўз бошлади Ҳамиджон Ғуломович. — Афсуски, жамоамиз бунинг удддасидан чиқа олишмади. Қолаверса, олий лигада ўз ўрнини сақлаб қолишга уринаётган “Қўқон-1912” жамоаси ҳам бунга имкон бермади. Чемпионат тақвимида юзага келган йигирма кунлик танаффусдан унумли фойдалана олмадик. Бир неча назорат ўйинлари ўтказишни режалаштирган эдик. Афсуски, айрим сабаблар туфайли бу амалга ошмай қолди. Бу эса бугунги ўйинимизга ўз таъсирини ўтказди.

Мухлислар икки бўлимда икки хил ўйинга гувоҳ бўлдилар. Ҳар иккала жамоада ҳам голга тортадиган вазиятлар етарли бўлган бўлса-да, афсуски йигитларимизга ҳал қилувчи паллада совуққонлик етишмади. Бир сўз билан айтганда, бугун жамоамиз мағлубиятга тенг дуранг қайд этишди. Натижада ўз майдонимизда қимматли очколарни йўқотдик. Кейинги учрашувларда бой берилган очколар ўрнини қоплаш учун бор куч ва имкониятимизни ишга соламиз.

“Қизилқум” ПФК Матбуот хизмати.

Ҳавола :

Манба : championat.asia

Янгиликларни Телеграмда ўқинг!

Рейтинг: +1