Футбол ҳақиқатан ҳам биринчи ўриндами?

Ушбу тарихий натижа кичик болакайлардан бошлаб, мамлакат президентини ҳам хурсанд қилди. Қўшни мамлакатлар етакчилари президентимизни айнан терма жамоанинг ютуғи билан алоҳида табриклагани эса мамлакат юртбошини янада қувонтиргани ва мағрур қилгани аниқ. Энди Ўзбекистон океан ортидаги мундиалга боради, бир ой давомида бутун дунё бизнинг мамлакатимизга эътибор қаратади. Хорижий нашрлар, футболчилар ҳақида ёза бошлайди, миллионлаб мухлислар эса Ўзбекистон қандай мамлакат эканлиги ҳақида билиб олади, балки келажакда шу воқеийликдан сўнг юртимизга саёҳ бўлиб келишлари ҳам мумкин. Хуллас, МТЖ мундиалга йўл олгани бизга фақатгина фойда келтиради.

Биз Жаҳон чемпионатига чиқишга ҳар доим яқин келганмиз ва Осиёнинг энг кучли терма жамоаларидан кейинги асосий даъвогар бўлганмиз, аммо буларнинг ҳаммаси қийинчиликларга ва тўсиқларга қарамай, қайд этилган натижа. Русчасига айтганда "вопреки". Шарқий Осиё мамлакатлари футболга ажратаётган маблағи, ЎФАга келиб тушаётган пуллардан бир неча баробар кўпроқ. Замонавий футболда эса барчаси маблағга боғлиқ. Лекин шунга қарамай, Ўзбекистон мундиал иштирокчисига айланди, масалан, Таиланд ёки Индонезия эса бундай натижага қайд этишдан анча йироқ. Узоқ йиллар давомида ва ҳалигача омма футболдан фақат ва фақат натижа талаб қилиб келган, бироқ етарлича шароитлар ва имкониятларсиз. Ишонмасангиз, ЖЧ-2014 учинчи саралаш босқичи доирасидаги Жанубий Кореяга қарши сафардаги учрашувга МТЖ қандай аҳволда етиб борганини эсланг. Агар ўша вақтда МТЖ учун нормал шароит яратиб берилганида биз Бразилияга борган бўлардик, менимча. Орадан 11 йил ўтди, аммо футболга бўлган эътибор ҳали ҳамон ўзгармагандек.

Сабаби бугун бир неча соатдан сўнг машҳур хонанда Женнифер Лопеснинг концерти "Бунёдкор" стадионида ўтказилади. Ушбу концерт афишаси анча катта муҳокамаларга сабаб бўлди. Машҳур хонанда илк маротаба юртимизга ташриф буюрмоқда. Бундай тадбирлар Тошкентга анча керакли ва ёшларга маъқул келиши аниқ. Минг афсуски, бундай қизиқарли тадбир "Бунёдкор"да ўтказилмоқда. Ҳа, ўша чими ўзбек футболида катта муаммо ва муҳокамаларга сабаб бўлган "Бунёдкор" стадиони. Устига-устак, концерт туфайли Суперлига жабр кўрмоқда. Эртага "Бунёдкор" Суперлига 17-тури доирасида "Шўртан"ни ўз уйида қабул қилиши керак эди, аммо бизга концерт муҳимроқдек. "Бунёдкор" учрашувни ўз стадионида эмас, ЖАРда ўтказадиган бўлди.. Қизиқ, тўғрими? Европа чемпионатларидан бирида шундай ҳолат бўлиши мумкинми? Тасаввур қилинг, "Атлетико" стадионида концерт ўтказилаётгани учун бир учрашувни "Сантьяго Бернабеу"да ўтказса.

Айтганча, футбол стадионларида концерт ва турли хил тадбирларни ўтказиш бутун дунё бўйлаб урфга кирган. Бу нормал ҳолат ва қўшимчасига стадион бундай табдирлардан мўмайгина даромад қилиб олиши ҳам мумкин. Масалан, аввалроқ мисол қилиб келтирган "Атлетико Мадрид" клуби ҳам ўз стадионида турли хил тадбирларни ўтказади ва шу орқали яхшигина пул ишлайди. 28 июнь куни машҳур "Imagine Dragons" гуруҳи "матрасчилар"нинг стадиони "Рияд Эйр Метрополитано"да ўз концертини ўтказди. Шунингдек, "Рияд Эйр Метрополитано" бутун ёз давомида қабул қилади.

2025 йилда "Метрополитано"да ўтказиладиган концертлар:

 • 30 май: Ed Sheeran

 • 31 май: Ed Sheeran

 • 7 июн: Natos y Waor

 • 14 июн: Lola Indigo

 • 20 июн: Dellafuente

 • 21 июн: Delafuente

 • 28 июн: Imagine Dragons

 • 5 июл: Iron Maiden

 • 12 июл: AC/DC

 • 16 июл: AC/DC

 • 22 июл: Stray Kids

 • 23 июл: Stray Kids

 • 30 июл: Aitana

 • 31 июл: Aitana

Бироқ барча концертлар ёзда ўтказилмоқда, "Атлетико" стадионидан фойдаланмаётган вақти. Бизда эса Лопес концерти туфайли "Бунёдкор"нинг ўйини бошқа стадионга кўчирилди. Футболга бўлган эътиборни сезяпсизми? Стадион аслида футбол учрашувларини қабул қилиш керак ва бу асосий вазифадир. Бизда эса концерт туфайли футбол клуби ўз режаларини ўзгартиришга мажбур. Мана шундай кичик деталлар футболимизга ривожланишини секинлаштиради. Сабаби, футболда майда деталларнинг ўзи йўқ. Майдон ҳолати ҳам катта аҳамиятга эга.

"Sputnik Armenia" нашри хабар беришича, Женнифер Лопеснинг концертидан сўнг Арманистон терма жамоаси учрашувлари ўтказиладиган "Республика" стадионининг майсани жуда ёмон аҳволга келиб қолган. Концерт дастуридан сўнг стадионда бўлишга улгурган шахсларнинг сўзларига кўра, стадионда энди футбол учрашувларини ўтказишнинг иложи йўқ. Чимни аввалги ҳолатга келтириш учун эса катта ҳажмдаги иш бажарилиши керак.

Газон главного стадиона Армении после концерта Лопес сильно поврежден: источник

Август ойи охирида эса "Бунёдкор" стадиони Cafa Nations Cup баҳсларини қабул қилиши керак. Концерт дастуридан сўнг майдон ҳолати қандай бўлади? Агар чим жабр кўрса, уни тиклаш ва аввалги ҳолатга келтириб олиш учун қанча вақт талаб этилади? Бу саволларга жавобни ҳеч ким бера олмаса керак. Афсуски.

Мақола бошида айтганимдек, футболда эришилаётган натижаларнинг барчаси қийинчиликлар ва тўсиқлардан ўтиб эришилмоқда. Футболдан натижа талаб қилишдан олдин барча шароитларни яратиб беришимиз керак. Биз эса фақат футболни танқид қилиш ва ҳазил қилишдан буёғига ўтмаймиз. Боримиз шу, афсуски. 

P.S Бугун концертга борадиганлар, майдонда кўп сакраманглар, илтимос.