– Бугунги ўйин ҳақида ўз фикрларингиз билан ўртоқлашсангиз.
– Бугун жуда ҳам ғалаба қозонишни хоҳлаган эдик. Билмадим, бу нима билан боғлиқ, лекин бугун йигитлар ўз даражасида ўйин кўрсата олишмади.
– "Олимпик-MobiUz"нинг охирги тўртта-бешта ўйинни оладиган бўлсак, "Лочин" билан ўйиндан кейин жамоа жуда ҳам яхши формага кириб олган эди ва асосан, йирик ҳисобда ютиб келаётган эди. Бугун нимагадир ўзига ўхшамади. Бу нима билан боғлиқ, балки рақибнинг кучи биланми?
– Балки рақиб ҳам кучли ҳаракат қилди, буни ҳам тан оламиз, лекин барибир ҳал қилувчи эпизодларда ютқаздик. Айниқса, олдинги чизиқда, ҳужумда ўйнаётган ўйинчиларимизга агрессия етишмади, охирги зарбаларда ютқаздик, охирги паслар етиб бормади. Бугун, айтганингиздек, мен кутган ёки уларнинг ўз даражасидаги ўйинини ҳеч ким кўрсата олмади. Бу нимадан келиб чиққанини таҳлил қиламиз. Балки уч-тўртта ўйиндан бери бир хил таркиб ўйнаяпти, кимдадир чарчоқ бордир. Балки бошқа сабабдир, буни кўриб чиқамиз.
– Бугунги учрашувда кўп хатоларга йўл қўйилди. Мисол учун, "Олимпик-MobiUz" атрофидаги жамоаларга назар соладиган бўлсак ҳам, мисол учун, "Металлург" ҳам, "Яйпан" ҳам ўзаро дуранг ўйнади. Яъни рақиблар очко йўқотган турда сизлар бундан фойдалана олмадинглар, худди "Шўртан" "Арал" очко йўқотганидан фойдалана олмагани каби. Бу қанчалик ёқимсиз ва аламли?
– Жуда ҳам ёмон. Айтяпман-ку, биз ўз уйимизда ўйнаяпмиз. "Шўртан" – кучли жамоа, лекин биз фақат ғалаба учун тайёргарлик кўрган эдик. Рақибдан қўрқиш йўқ эди. Айтганимдек, ўйинчиларим ўз даражасидаги ўйинни кўрсата олишмади. Жуда кўп эпизодларда ютқаздик, шунинг ҳисобига, ўйлашимча, ютқазишимиз ҳам мумкин эди. Айрим вазиятларда омад ҳам бизга озгина кулиб боқди. Билмадим, нима билан боғлиқ, лекин бугунги ўйиндан кўнглим умуман тўлмади.
– Охирги саволим: бугун бир неча ўйиндан бери бир хил таркиб тушяпти, балки чарчоқ билан боғлиқдир, деб айтиб ўтдингиз. Кейинги турда жамоани анча жиддий синов кутиб турибди. Яъни бу – охирги ўйинларда кўпчиликнинг назарига тушган "Ғазалкент" билан тўқнашув ва сиз ҳозир эътироф этган ўша чарчоқ бўлажак ўйинга қай даражада таъсир ўтказиши мумкин?
– "Ғазалкент" – кучли жамоа, мен уларни ҳурмат қиламан. Кучли таркибга эга. Таркиби ёш, дейишингиз мумкин, лекин энг кучли, сифатли ўйинчилар йиғилган. Шунинг ҳисобига улар яхши натижа кўрсатиб келяпти. Уларнинг охирги ўйинларини кўриб чиқдик ва унга ҳам тайёргарлик кўряпмиз. Тикланиш устида жиддий иш олиб борамиз. Ўйлайманки, "Ғазалкент" билан ўйинга биз яна аввалгидек кучли бўлиб қайтамиз.
– Абдуғофур Ҳайдаровнинг кетиши бўйича ҳам ҳозир савол бўлаётганди. У яхши ўйнаб турганди, бугунги турда кетди, деган хабар чиқди.
– Тўғри, кетди, уни мажбурлаб олиб қолишни истамадик. Кетишни хоҳлади. Яхши формага кирди, ўзини тиклади. Яхшироқ таклиф чиқдики, у кетиб қолди. Энди бу биз учун йўқотиш, ишимиз шу – ҳаракат қиламиз, бошқасига имконият берамиз, бошқа ўйинчиларни тайёрлашга ҳаракат қиламиз.
– Унинг ўрнини шу ерда ким билан тўлдириш мумкин?
– Ҳозир кўрганингиздек, унинг ўрнини тўлдирадиган йигит энди ўйнашни бошлаяпти. У ҳам ёш, 2007 йил, у ҳам U-20 терма жамоасига жалб қилинадиган ўйинчи. Кўриниб турибди, кўп ўйин амалиёти йўқ, охирги ўйинларда ўйнаяпти, лекин барибир ўйин тонусида эмас. Ўйлайманки, бир-иккита ўйиндан кейин у ўзига келади ва Ҳайдаровнинг ўрнини босади.
– Охирги саволим. Бизларда жароҳат олган ўйинчиларнинг жароҳатдан қайтиши қанчалик тезлашмоқда ёки асосий таркибга тушиши мумкин?
– Бизда жиддий йўқотиш бор, йилнинг бошидан бу ҳолат юз берган. Биз ўша жамоани йиққан пайтимизда, олдинги чизиққа умуман бошқа йигитларни жалб қилган эдик. Афсуски, улар бошидаги иккита-учта тур ўйнашди, шундан бери ўйнагани йўқ. Олдинда ўйнаётган учта ўйинчимиз ҳам жароҳатда. Улар бу ҳафтадан машғулотларни бошлади. Насиб қилса, кейинги ўйинлардан секин-аста асосий таркибга, асосий гуруҳга қўшилишни бошлайди.
