— Фарҳод ака, бугунги ўйин ҳақида ўз фикрларингиз билан бўлишсангиз...
— Бугун қийин ғалаба қозондик. Чунки ўтган ўйинда “Металлург” билан яхши ўйин кўрсатиб, лекин натижага эриша олмагандик. Бугун аксини кўрдик: ўйинимиз ўхшамади, лекин муҳим уч очкони қўлга киритдик. Йигитлар ҳаракат қилди, хатоларга йўл қўйдик, кўплаб вазиятлардан фойдалана олмадик. Барибир рақиб ҳам яхши қаршилик қилди, ҳимояда тартибли ўйнади. Булар ҳам бор, лекин эътирозим йўқ — муҳими уч очко.
— Биринчи бўлимдаёқ ўзгаришга қўл урдингиз, буни сабаби нимада?
— Мажбур бўлдик. Чунки у ўйинчимиз анчадан бери ўйнамаётганди, жароҳат олиб, деярли бу йил энди майдонга чиқиши эди. Бошида ўша йўл қўйган хатосига реакция билдира олмади, ўзига кела олмади. Шунинг учун кейинги хатолар келиб чиқмаслиги учун алмаштирдик.
— Бугун умуман олганда "Олимпик МобиУз"дан кутилган яққол устунлик кўринмади. Бунга балки 19-тур учрашувининг олдинга сурилгани сабаб бўлгандир, жамоада чарчоқ борми?
— Албатта, чарчоқ бўлган. Аслида бўлмаслиги керак, лекин руҳий томондан жуда кўп зарба бўлди. Биз учун оғир ўйин бўлди у, оғир ва аламли мағлубиятга учрадик. Шунинг учун мен ўзим ҳам, мураббийлар ҳам, йигитларда ҳам шу нарсани кўрдим — бу ўйинга руҳан тиклана олмадик.
— Бугун учта яққол голли вазият кўкка совурилди. Мана шу вазиятлардан унумли фойдалана олмаслик эвазига очко йўқотишдан қўрқмайсизми?
— Ҳар ўйин панд еймиз. “Металлург” билан ўйинда вазиятларимиздан фойдаланганимизда йирик ҳисобда ютган бўлардик. Энди бу бизга боғлиқ эмас, чунки футболчиларнинг маҳоратига, тажрибасига боғлиқ. Жамоа вазиятлар яратяпти, голли вазиятлар жуда ҳам кўп яратяпти — бу дегани жамоа ўйин бўйича ютқазмаяпти. Бизнинг ишимиз уларни ўша вазиятгача олиб бориш. Вазиятдан фойдаланиш барибир футболчининг маҳоратига боғлиқ. Бу ҳам секин-секин вақти-вақти билан жойига тушиб кетади деб ўйлайман. Агар вазият бўлмай туриб ютқазсак, бу жуда ёмон. Вазиятлар бор, лекин фойдаланиш бўйича жуда кўп ишлар қилиняпти.
— Терма жамоага чақирилган футболчилар ҳақида ҳам тўхталсангиз: бугун уларнинг ўрни жуда билинди...
— Албатта, терма жамоага чақирилган ўйинчилар — ўз номи билан терма жамоа, кучли. Биз учун биринчи навбатда барибир терма жамоа туради. Шунинг учун уларга омад тилаймиз. Уларнинг ўрни жуда ҳам билинди, ўрнини ёпишга ҳаракат қилдик. Ҳозир қувонарлиси — ўша йилнинг бошида жароҳат олган ўйинчилар секин-секин формасига кириб боряпти. Агар улар формасига кирса, кейинги ўйинларда бу ҳам муаммо бўлмайди деб ўйлайман.
— Миллий терма жамоа ўйини ҳисобига 19-тур учрашуви олдинга сурилди. Бу нарса миллий терма жамоа ғалабаларига қараб давом этаверадими, режалаштирилганми?
— Албатта, бизнинг жамоамизнинг ташкил этилишидан, лойиҳамиздан мақсад — биринчи ўринда терма жамоа. Терма жамоа манфаати учун ҳамма қилинаётган ишлар ПФЛ билан келишган ҳолда олдинга суриб ўйнашга қарор қилинди. Барибир кейинга қолдириб ўйнайдиган бўлсак, у ёғига ўйинлар сони кўп, рақибда ҳам, бизда ҳам муаммо бўлиши мумкин эди. Шунинг учун келишган ҳолда олдинга суриб ўйнадик. Албатта, биринчи навбатда терма жамоа манфаати учун.
