— Мураббийлик фаолиятингиздаги илк таассуротлар қандай бўлди?
— Бу мутлақо бошқача ҳиссиёт экан. Мураббий сифатида жуда кўп нарсага эътибор қаратишингиз, кўплаб масалаларни назорат қилишингиз ва жиддий тайёргарлик кўришингиз керак бўлади. Албатта, ич-ичингизда ҳаяжон ва бахт ҳисси бўлади, аммо охир-оқибат бутун эътиборингиз жамоага қаратилади. Натижада атрофдаги жуда кўп нарсаларни сезмай қолишингиз ҳам мумкин. Футболчи сифатида эса турнирдан кўпроқ завқ олиш имконияти юқори бўлади.
Мураббийнинг футболчидан фарқи шундаки, мураббий сифатида жуда кўп азият чекасиз, чунки сиз майдон ташқарисида турасиз. Футболчиларга ёрдам бергингиз, ҳамма нарсани назорат қилгингиз келади, лекин буни тўлиқ уддалай олмайсиз. Фақатгина баъзи ўзгаришларни амалга оширишингиз мумкин, холос. Шу сабабдан ҳам мураббий кўпроқ ташвиш ва босимни ҳис қилади.
— Колумбияга қарши ўйиндан кейин қандай хулосаларга келдингиз?
— Колумбияга қарши учрашувдан кейинги энг катта сабоқ шу бўлдики, бу даражадаги турнирларда хатолар жуда қимматга тушишини англаб етдик. Биз ажойиб ўйин ўтказдик, жамоавий ҳаракат қилдик, агрессив ва интизомли ўйнадик. Лекин бир лаҳза эътиборни йўқотсангиз ёки рақибни назоратсиз қолдирсангиз — жазоланишингиз аниқ. Биринчи голдаги ҳолат бўлмаслиги учун узоқ вақт тайёргарлик кўргандик, аммо барибир хатога йўл қўйдик. Иккинчи гол эса аутдан кейин юзага келди. Мен футболчиларга марказ орқали ўйнамаслик кераклигини айтгандим, чунки бу жуда ҳам хавфли ҳудуд ҳисобланади. Шунинг учун бу даражадаги хатолар сонини камайтириш биз учун жуда муҳим.
Шу билан бирга, иккинчи бўлимдаги ўйинимиздан жуда мамнун бўлдим. Мен доим футболчиларга: "Агар тўп бизда бўлса, ўз услубимизни кўрсатишимиз керак", деб уқтираман. Футболдан қўрқмаслик, ўзимизга ишониш ва ўйин завқини ҳис қилишимиз зарур. Иккинчи бўлимда жамоа айнан шуни кўрсата олди. Улар ўйинни назорат қилишга уринишди, гол уришди ва яна гол уриш учун кўплаб имкониятларга эга бўлишди. Афсуски, учинчи голни ҳам ўтказиб юбордик ва бу биз учун жуда оғир бўлди.
— Навбатдаги рақиб — Португалия терма жамоаси ҳақида нима дея оласиз?
— Мен футболчиларимдаги босимни камайтиришга ҳаракат қиламан, чунки биз жаҳон чемпионатининг энг кучли жамоаларидан бирига қарши ўйнаймиз. Португалия таркиби юлдузли футболчиларга тўла. Ва, албатта, уларда Криштиану Роналду бор — сўнгги 20 йил ичида Лионель Месси билан бир қаторда дунёнинг энг буюк футболчиларидан бири бўлиб келаётган афсона. Португалия тўпни назорат қилишни яхши кўради ва рақибга босим қилиш имконини бермайди. Улар қисқа паслар орқали ўйинни бошқаришади ва ҳар бир вазиятда хавф туғдира олишади.
Шу сабабли, биз ҳимояда жуда интизомли бўлишимиз шарт. Шу билан бир қаторда, тўп бизга ўтганда уларга муаммо туғдиришга ҳаракат қилишимиз лозим. Ҳар бир жамоанинг кучли ва заиф томонлари бўлади. Биз уларнинг кучли жиҳатларини имкон қадар чеклаб, заиф томонларидан фойдаланишга интилишимиз керак.
Ҳа, албатта, Роналду — буюк футболчи ва катта юлдуз, аммо ўйин бошланганидан кейин буларнинг барчасини унутиш керак. Биз фақат ўз вазифамизга эътибор қаратишимиз шарт. Майдондан ташқарида футболчилар ўртасидаги муносабатлар жуда яхши бўлиши мумкин, лекин майдонда сиз дўст эмассиз. У ерда фақат ўз жамоангиз манфаатини ўйлашингизга тўғри келади.
— Ушбу ЖЧдан кейин одамлар жамоангизни қандай эслаб қолишларини истардингиз?
— Турнир якунида одамлар Ўзбекистонни жаҳон чемпионатида илк бор қатнашаётган, лекин кучли жамоалардан қўрқмайдиган жамоа сифатида эслаб қолишларини хоҳлайман. Биз чиройли футбол кўрсатадиган, яхши ташкил этилган ва интизомли жамоа сифатида танилишимиз керак. Шунингдек, биз барча рақибларни ҳурмат қиламиз ва улардан ҳам ўзимизга нисбатан худди шундай ҳурмат билан муносабатда бўлишларини истаймиз
