Ўйиндан кейин "Лочин" бош мураббийи Элдор Мойлиев матбуот анжуманида иштирок этди.
- Ўйин ҳақида фикрингиз?
- Биринчи бўлимда ҳам, иккинчи бўлимда ҳам баҳсни тўлиқ назорат қилдик. Тўп билан ва тўпсиз яхши ўйин кўрсатдик. Узоқдан йўлланган зарбалар эвазига ғалаба қозондик. Ушбу ютуқ билан жамоамиз мухлисларини табриклайман.
- Жавоҳир Ҳасанов рақиб дарвозабони билан тўқнашиб кетди. Унинг ҳолати қандай?
- Аҳволи яхши, фақат озроқ мия чайқалиши рўй берди. Шу боис тезда захирага олдик. Ҳозир футболчимиз ўзини яхши ҳис қиляпти.
- "Лочин"нинг асосий футболчилари бошқа клубларга ўтмоқчи экан. Уларнинг ўрнини қандай тўлдирасиз?
- Ўйинчиларимиз билан амалдаги шартнома бор. Мен кимдир кетмоқчи эканини эшитмадим. Тўғрисини айтсам, бу ҳақда ўйлаб кўрганимиз йўқ. Буёғига иккинчи даврага ҳозирлик кўрамиз. Насиб қилса, юқори ўринлар учун курашамиз. Жамоамиз ўйиндан ўйинга ўз ўйинини топиб боряпти. Рақибларни ўрганиб олдик, ҳамма билан бемалол ўйнаса бўлади.
