"Бугун йигитларнинг иштиёқи эвазига ғалаба қозондик. Қарши ҳужумларда омадимизни синаб кўриш борасида тайёргарлик кўрган эдик. "Локомотив"нинг ўйинларини таҳлил қилганимизда тўп билан яхши муомала қилганини кузатдик. Кўп жамоалардан бу борада устунлик қилган. Шундан келиб чиқиб ўйин услубимизни қарши ҳужумларга мослаштирдик. Ўйлаган режаларимиз иш берди. Бугунги ғалабани мухлисларимизга бағишлаймиз. Йигитларга борини бергани учун раҳмат айтаман", — дейди Элдор Мойлиев.
- Про лига орқали мақсадга етишиш осонроқми ёки кубок ўйинлари биланми?
- Ўтган сафар айтганимдек асосий мақсадимиз Суперлигага футболчиларни тайёрлаб бериш. Саволингизга келсак, кубок ўйинлари орқали осонроқ деган бўлардим. Суперлига жамоалари билан ўйинларда футболчилар ўзларини кўрсатади. Ҳар бир мутахассис ўйинларни кузатишини айтишим мумкин. Суперлига клубларига қарши ўзини кўрсатса осонроқ бўлади.
- "Лочин" Про лигада кучли бешликда. Лекин жамоада яққол тўпурар йўқ. Бунинг сабаби нимада?
- Биз жамоавий ўйинни йўлга қўяпмиз. Ҳужумда кўп ўйлаган нарсаларимиз амалга ошаётгани йўқ. Ҳозирда ҳар 4-5 кунда ўйин ўтказилмоқда. Ҳужум чизиғидаги ишланмаларга вақтимиз кўп ҳам бўлмаяпти.
- Иккинчи бўлимда рақибга тўпни бериб қўйиш гол ўтказиб юбориш хавфини кўпайтирмасмиди?
- "Локомотив" шунга мажбур қилди. Тўпни берган билан тартибли ҳимояландик. Қарши ҳужумда фойдаланишга тезкор футболчиларимиз бор эди. Имкониятларимиз бўлди лекин техник хатолар панд берди.
- Ҳужумни якунлашга тажриба етишмаяптими ёки бошқа сабаби борми?
- Форвардларимиз асосан ёшлар. Кўпчилиги ҳали Про лига даражасида ҳам ўйнамаган. Тажриба камлиги сабаб якун ўхшамаяпти. Ҳужумчиларимизга ўзига бўлган ишонч ва совуққонлик етишмаяпти.
- Бу ғалаба кейинги ўйинларга қанчалик ишонч беради?
- Ўйлайманки, бу ғалабадан сўнг йигитларнинг ўзига бўлган ишончи ортади.
