Ўйиндан кейинги матбуот анжуманида "БухДУ" жамоаси бош мураббийи Азамат Шарипов матбуот анжуманида иштирок этди.
- Ўйин ҳақида фикрингиз?
- Аввало "Бухоро" жамоасини ғалаба билан табриклайман. Бугунги баҳс байрамона кайфиятда ўтди деб ўйлайман. Негаки вилоятимизнинг икки жамоаси ўзаро баҳс олиб борди. Мухлислар маза қилиб кўрадиган ўйин бўлди. Футболчиларимизга ўйин учун раҳмат айтаман. Биз "Бухоро"га яхши қаршилик кўрсата олдик. Тенгма-тенг кураш олиб борганимиз учун ҳам йигитларга раҳмат айтиб қоламан.
- Биламизки, "БухДУ" ўтган мавсумни Биринчи Лигада ўтказди. Бу йил Пролигада ўйнаяпти. Жамоангиз бу орада қанчалик ўсишга эришди?
- Тўғри, ўтган йил Биринчи лигада иштирок этиб иккинчи ўрин билан Пролигага чиқдик. Ҳар икки Лига ўртасидаги фарқ бор, ўйин даражаси анча юқори деб ўйлайман. Биринчи лигада тўпни қабул қилиб бемалол ҳаракат қилсангиз бўлади, лекин Пролигада бунга имкон беришмайди. Кўп куч талаб қилади. Насиб қилса, ўйинчиларимиз секин-аста Пролига талабига мослашиб боряпти.
- Пролигада танаффус юзага келиб Кубок баҳсларига старт берилди.
- Пролигада танаффус берилгани бизга ҳам қўл келди. Бир ой ичида 7та турни ўтказдик. Ривожланишимиз учун Кубок баҳслари айни муддао деб ўйлайман. Клубимизда селекция ишлари кетяпти. Икки-учта чизиққа янги футболчилар керак. Иккинчи давра олдидан "Бухоро" U-21 жамоасидан ўйинчиларни қўшиб оламиз.
- Бугун жамоангиз охиригача курашди.
- Бугунги ўйин ўзига хос дерби бўлгани учун ҳам футболчиларимиз охиригача курашишди ва шу орқали "Бухоро" клубига ўзларини кўрсатишга ҳаракат қилишди. Буни табиий ҳол деб ўйлайман. Доим айтиб келяпман: мақсадимиз - футболчиларни Суперлигага тайёрлаб бериш. "Каттақўрғон" билан баҳсда ўз ўйинимизни кўрсата олдик. Қишки йиғинни жуда кеч бошладик, шу боис Пролиганинг дастлабки 6та турида ҳеч нарса қила олмадик. Лекин охирги икки турдаги ўйинимиз менга ёқди.
- Бугун футболчиларга тинмай кўрсатма бериб турдингиз.
- Мақсадимиз футболчиларни ривожлантириш. Ўйинчи тўп билан экан мен унга гапирмайман. Кўпинча тўпсиз футболчиларга кўрсатма берамиз, шунда улар бизни эшитади.
