Ўйиндан кейин "Шўртан" бош мураббийи Асрор Алиқулов матбуот анжуманида иштирок этди.
- Ўйин ҳақида фикрингиз?
- Учрашув курашларга бой бўлди. Майдонга кўникиш сал қийин кечди. Стандарт вазиятдан гол ўтказдик. "Жайхун" жамоаси охирги ўйинларда ҳам ўз майдонида, ҳам сафарда яхши ўйин намойиш этиб келяпти. Айниқса ўз уйида охиригача кураш олиб боради. Шу боис йигитларни яхши тайёрлашга ҳаракат қилдик. Бугун мухлисларбоп футбол кўрмадик деб ўйлайман, ҳар икки жамоа тўпни йўқотмаслик учун эҳтиёткорлик билан ҳаракат қилди. Қийинчилик билан ғалабага эришдик, бир ҳолатда бирга бир вазиятдан фойдалана олмадик. Бугунги меҳнат учун футболчиларга миннатдорчилик билдираман ва "Шўртан" мухлисларини ғалаба билан табриклайман.
- "Жайхун" ҳимояга урғу бериб қарши ҳужумларни маъқул кўрди. Бундай паллада жамоангиз қанчалик қийналди?
- Биз бу ҳолатни эътиборга олгандик. Чунки "Металлург" билан ўйинда "Жайхун" гол урганидан сўнг эътиборни ҳимояга қаратганди.
- "Шўртан" олдига Суперлигага қайтиш вазифаси қўйилганини биламиз. Жисмоний томондан жамоа бунга тайёрми?
- Бугунги толиқишни сунъий майдон ҳолати сабаб деб айтган бўлардим. Майдон ниҳоятда қаттиқ ва футбол ўйнаш оғир. Тўғри, бизда чарчоқ кўринди ва шундан сўнг ўйинчиларни алмаштирдик. Бугун рақибдан ва майдон ҳолатидан келиб чиққан ҳолда тактика ва таркибда ўзгаришлар қилдик. Баъзи етакчи футболчилар захирада қолди, бу ҳам режамизнинг бир қисми эди. Балки кейинги учрашувларда яна ротацияга қўл уришимиз мумкин.
- Иккинчи тўп киритилгач, футболчилар вақтни чўзишга ўтди. Шунга муносабатингиз?
- Агар Ғанишер Қодировнинг ҳолатини айтаётган бўлсангиз, у айёрлик қилди. Тўпни йўқотгач йиқилиб тушди ва майдонда ётди. Лекин биз футболчиларга вақтни чўзинглар деб кўрсатма бермаймиз. "Жайхун" дарвозабони тўпни ўйинга киритиши билан босим уюштириш ва рақибнинг узун паслар билан ўйнашига халақит бериш кўрсатмасини бергандик.
