Бунда "Шўртан" бош мураббийи Асрор Алиқулов иштирок этди.
- Ўйин ҳақида фикрингиз?
- Кубокнинг биринчи турида мағлубятга учрагандик. Шу боис бугунги баҳс аҳамияти биз учун юқори бўлди. "Ҳавоқанд" - ёш жамоа, ҳам Биринчи лигада ўйнайди. Шу боис йигитларга рақибни менсимаслик бўлмасин деб алоҳида уқтирдик. Рақиб яхши таассурот қолдирди, улар ҳам астойдил ҳаракат қилишди. Ўйин бошида бир нечта вазиятларга эга бўлдик, лекин гол кирита олмадик. Кейин голлар уришни бошлаб, йирик ҳисобда ғалабага эришдик.
- Айтиб ўтганингиздек, "Ҳавоқанд" Биринчи лигада иштирок этяпти. Сизнингча, Биринчи лига ва Пролига жамоаси ўртасидаги фарқ қандай?
- Энди барибир фарқ сезилади. Мени хурсанд қилган жиҳати, футболчиларда қўрқув йўқ ва босим уюштиради. "Ҳавоқанд" характерли жамоа экан, футбол ўйнашга бўлган хоҳиш юқорилиги ҳам кўриниб турди.
- Кейинги турда "Шўртан" "Насаф" билан ўйнайди. Жамоангиз "Насаф"га жиддий қаршилик кўрсата оладими?
- Биринчи навбатда Ғузорга қайтиб футболчиларни тиклаш устида иш олиб борамиз. Чунки беш кундан кейин навбатдаги баҳсни ўтказамиз. Бу биз учун муҳим ўйин бўлади, ўзимизни кўрсатишга ҳаракат қиламиз. Гуруҳдан чиқишни мақсад қилганмиз ва бунинг учун бор имкониятни ишга соламиз.
