Франциялик мутахассиснинг таъкидлашича, турнир иштирокчилари сонини ошириш қарорини қабул қилишда асосий омиллардан бири барча қитъа конфедерацияларига тенгроқ имконият яратиш бўлган.
"Жаҳон чемпионатида 48 та жамоа иштирок этиши ҳақида қарор қабул қилинганда кўплаб саволлар туғилган эди. Шахсан менимча, бу ахлоқий нуқтаи назардан тўғри қарор бўлди. Чунки аввал барча конфедерациялар етарлича ва тенг даражада вакилликка эга эмасди. Натижада кўплаб терма жамоалар мундиалда иштирок этиш имкониятидан маҳрум бўларди.
Айримлар бу жамоаларнинг савияси етарлими, деган саволни ўртага ташлашган эди. Аммо турнир давомида бунинг акси исботланди. Улар нафақат рақобатбардош эканини кўрсатди, балки мухлисларга ажойиб ўйинлар ва ёрқин футбол совға қилди.
Албатта, кўпчилик Кабо-Вердени эслайди. Лекин бундан ташқари ҳам ўзини яхши томондан кўрсатган жамоалар кўп бўлди. Турнирни таҳлил қилсак, терма жамоалар ўртасидаги савия фарқи тобора камайиб бораётганини кўриш мумкин", - деди Венгер.
Эслатиб ўтамиз, ЖЧ–2026 тарихдаги илк 48 жамоали мундиал бўлди. Янги формат туфайли Африка, Осиё ва КОНКАКАФ минтақаларидан кўпроқ терма жамоалар мусобақада қатнашиш имкониятига эга бўлди.
