- Ўйин ҳақида фикрингиз?
- Қийин ўйиндан кейин керакли сўзни топиш қийин. Шуни айтишим мумкин, футболчиларга бугунги учрашув ниҳоятда муҳим эканини кўп бор айтдик. Танаффусдан кейинги рестарт биз учун яхши кечмади. Кетма-кет учта мағлубиятга учрадик, бугун тўртинчиси рўй берди. Кўп имкониятлар, лекин гол йўқ... Биринчи таймдаги 0:0дан кейин танаффус пайти керакли кўрсатмаларни бердик. Лекин майдонга чиққач, хатолар ўша-ўша. Буни эса тушунмаяпман. Иккинчи бўлимда камида иккита тўп киритишимиз учун кераклича вазият яратдик, захирадан ўйинчилар тушди, лекин ҳеч нима ўзгармади. "Машъал" ва "Динамо" билан яхши ўйнаб юта олмагандик, бугун ҳам шу ҳолат такрорланди. Мен ҳар бир футболчининг миясига кира олмайман. Йигитлардан шунчаки натижа учун ўйнашимиз кераклигини сўрадим. Бизга натижа жуда зарур эди. Афсус, охирги тўртта ўйинда мағлуб бўлдик ва клуб раҳбарияти билан бу ҳақда гаплашиб истеъфо сўрадим. Бунақа давом этиши керак эмас. Ниманидир ўзгартириш керак.
- Жамоа қачонки гол ўтказганидан сўнг яхши ўйин намойиш этди. Нега голгача шундай ўйнай олмади?
- Биринчидан, рақибга нисбатан бир кун кам дам олдик. Иккинчидан, бугун тезкор ўйин намойиш этишимизга майдон халақит берди. Биринчи таймда икки бор яхши чиқдик. Негадир омад биздан юз ўгиряпти, нима учун шундай бўлаётганини тушунмаяпман. Тўғри айтдингиз, гол ўтказгандан сўнг турбо режимини ёқяпмиз. Биргина Соҳибжонов ўз зарбаси билан масалани ҳал қилиши мумкин эди.
- Нимели яхши ўйнаб турганди, аммо уни алмаштириб Табатадзени туширдингиз. Тома эса ўйинни кучайтира олмади.
- Нимели ҳақида олдин ҳам айтганман: у тиззасидаги оғриқ сабаб машғулотлардан четда қолди. У 14 кун биз билан бўлмади, фақат охирги тўрт кун машғулот олиб борди. 14 кун шуғулланмаган футболчидан нимадир кутиш қийин. Жавоҳир Сидиқов қаторасига учта ўйинни тўлиқ ўтказди, лекин бугун бу майдонда ўзини кўрсата олмади. Биз қўлдан келганча жамоани тиклаяпмиз. Шоҳруҳ Гадоев, Муҳаммаданас Ҳасанов захирадан тушиб ўйинни кучайтиришга ҳаракат қилишди. Қанотлардан тезкорликни оширамиз дедик. Бир нечта бурчак тўплари тепдик. Меҳмонлар дарвозабони бўйдор эмасди, бундан фойдаланишимиз керак эди. Биздан шунчаки омад юз ўгиряпти. Ҳар бир ўйинга жиддий ҳозирлик кўряпмиз, машғулотлар ҳам яхши кетяпти.
- Рестартдан кейин қаторасига тўртта мағлубият. Оралиқ танаффусдаги тайёргарликни қандай баҳолайсиз?
- Биз тўлиқ таркиб билан ҳеч йиғила олмадик. Жавоҳир билан Нимели даволанди. Кимдир кечикиб келди, кимдир яна бошқа сабаб билан вақтида кела олмади. Биз фақат "Машъал" билан ўйиндан олдин тўлиқ йиғилдик. Мен доим футболчиларга бир кунни ўтказиб юборсанг, уч кун шуғулланишга тўғри келади дейман. Футболда майда нарсалар бўлмайди. Бу билан ўзимни айбсиз демоқчи эмасман, лекин биз битта қайиқда эканмиз эшкакни ҳамма биргаликда тортиши керак. Кўрпани ҳамма ўз томонига тортса иш ўхшамайди. Бугун ҳеч ҳим захира сўрамади, ҳеч ким жароҳат олмади, футбол ўйнашимиз керак эди. Ҳисоб ҳатто 0:0 пайти ҳам ҳужумчини туширдик. Тошкентда йиғин ўтказиб, ўртоқлик учрашувлари ўтказдик. Ҳаммаси яхши бўлишига умид қилгандик.
