Бразилия футболи афсонаси ўзи акциядори бўлган C Сериянинг “Равенна” клуби сафида тўп тепади.
Клуб президенти Иньяцио Чиприанининг маълум қилишича, Роналдиньо фаолиятидаги сўнгги голини айнан ушбу клубда уриш умидида битта ўйинда майдонга тушади. Учрашув шу душанба, 24 август куни бўлиб ўтиши кутилмоқда.
Роналдиньо июнь ойида Майамидаги тантанали тақдимот маросимида “Равенна” билан шартнома имзолаб, машҳур ресторан ва меҳмонхоналар брендига эгалик қилувчи тадбиркор Чиприани бошқараётган клубнинг миноритар хўжайинига айланганди.
Ўтган мавсумда ўз гуруҳида учинчи ўринни эгаллаган “жаллоросси” янги мавсумни душанба куни “Режана”га қарши сафар ўйини билан бошлайди. Бироқ Италиядан келаётган хабарларда афсонавий футболчининг ушбу баҳсда иштирок этиши ҳозирча тўлиқ кафолатланмагани ва унинг майдондаги аниқ дақиқалари номаълумлиги қайд этилмоқда.
2002 йилги Жаҳон чемпионати ғолиби ва 2005 йилги “Олтин тўп” соҳиби сўнгги бор 2015 йилда “Флуминенсе” сафида профессионал даражада ўйнаган. Бу унинг 2008-2011 йиллардаги “Милан”даги давридан кейин Италиядаги иккинчи саҳифаси бўлади.
Таъкидлаш жоизки, 1913 йилда ташкил этилган “Равенна” клуби 12 000 ўринли камтарона “Бруно Бенелли” стадионида ўйнайди.
