Timur Kapadze: "Futbolchilar xatolar orqali o'sishadi"

- O'yin haqida

- Ilk navbatda "Metallurg"ni g'alaba bilan tabriklayman. O'yin yaxshi o'tdi. Ikki jamoa ham musobaqa jadvalidagi o'rnidan qati nazar g'alaba uchun chiqishdi. Biz ham yaxshi tayyorgarlik ko'rgandik. Yigitlarimiz yaxshi harakat qilishdi. "Metallurg" yaxshi himoyalandi. Ayniqsa, birinchi bo'limda pressing orqali ham bizga qiyinchilik tug'dirishdi. Yigitlarga rahmat aytaman. Ular yaxshi kurashishdi. Endi keyingi mavsumga tayyorlanamiz.

- Har ikki golda ham futbolchilar xatosi ko'zga tashlandi. Ular yosh futbolchi deyiladigan darajadan o'tdimi? 

- Ular yosh. Bunda tajriba muhim ahamiyatga ega. Ular o'tgan ikki yilga qaraganda ulg'ayishdi. Jamoamizdagi yigitlarning ko'pi bu yil debyut qildi. Albatta, ular bilan ishlashda davom etamiz. Nazariy mashg'ulotlarda bu borada ish olib boramiz. 

Ularga vaziyatlardan qay tarzda chiqib ketishni o'rgatyapman. Xatolar orqali ular o'sishadi. Kelasi safar bunday xatoga yo'l qo'ymaslikka harakat qilamiz. Gollar o'tkazib yuborilgan vaziyatlarni qo'pol xatolar demagan bo'lardim. 

- Jasur Jaloliddinov o'zimizning chempionat va "Olimpik" safida kuchlidek ko'rinmoqda. U katta klublarda o'ynash uchun qay darajada o'zini tiklab oldi? 

- U bemalol o'ynay oladi. Bizda futbolchilar yoshi nisbatan bir-biri bilan teng, lekin asosan kattalarga qarshi o'ynaymiz. Jasur ularga qarshi yaxshi o'ynay olmoqda. Mavsum avvalida uning jismoniy holati yaxshi emasdi, lekin so'nggi paytlarda u yaxshigina kuchaydi. Bemalol 90 daqiqa yugura oladi. Uning to'p bilan qanday harakat qila olishini bilamiz, lekin to'psiz harakatni ham esdan chiqarmaslik kerak.