SHahboz Beg'amov: "Hindiston ustidan g'alaba hech narsani anglatmaydi. Haqiqiy Osiyo Kubogi endi boshlanyapti"

Kamoliddin Alimov boshchiligidagi efirda taniqli futbol mutaxassisi SHahboz Beg'amov mehmon sifati qatnashdi va o'z fikrlarini bildirdi. 

"Guruhdagi qilishimiz kerak bo'lgan ishni qildik. Hindiston ustidan g'alaba hech narsani anglatmaydi. SHunchaki yo'limizda davom etyapmiz. Endilikda qolgan har bir o'yin terma jamoamizning holatini baholab beradi. Biz uchun Osiyo Kubogi endi boshlanyapti. Suriya bilan durang bo'ldi. Hindistonni yutishimiz kerak edi. Asl holatimizni, Katanecning haqiqiy ishini endi ko'ramiz. Hindistonni yutish yangilik emas. Suriya bilan o'yin ko'pchilikni tanqidiga uchradi va bu o'rinli edi. Hindiston bilan sxemani o'zgartirgani foyda keltirdi. Murabbiy xatolardan to'g'ri xulosa chiqara oldi. Balki bu Katanecning rejasida bo'lgandir. 

Avstraliya bilan o'yinni ham o'ta muhim, deb bo'lmaydi, chunki ikki jamoani durang ham qoniqtirishi mumkin. Albatta, birinchi o'rinni olish yoqimli bo'ladi. Raqib tanlash esa ehtimollar nazariyasida bo'ladi. Lekin hech bir jamoa yoki murabbiy birinchi yoki ikkinchi o'rin bilan chiqqan yaxshi, degan yo'lni tanlamaydi. Bu aslida zararga ishlashi mumkin. Har qanday futbolchi g'alabani ko'zlab chiqadi. Raqib tanlash restoranga kirib o'zingiz istagan taomni tanlash, degani emas. Oson, deb o'ylagan raqib kutilmaganda zarba berib qolishi mumkin",- deydi SHahboz Beg'amov.