O'zbek futbolida faoliyati eng uzoq davom etgan legioner futbolchilar haqida bilasizmi? (Bekzod Tolibov blogi)

Akmal Xolmatov (Tojikiston)

1996 yilda Yuriy Sarkisyan boshqaruvidagi "Neftchi" safiga Tojikistonning "Regar TadAZ" klubidan kelib qo'shilgan Akmal Xolmatov o'zbek milliy chempionailarida jami 21 yil davomida o'ynagan. Farg'ona klubi safida 1996 yildan 2007 yilga qadar o'ynagan tojikistonlik futbolchi 2008 yilda "Paxtakor"ga ko'chib o'tgan. Toshkentliklar tarkibida 2 yil mobaynida o'ynagan Xolmatov 2010 yilda Xamadonning "PAS" klubiga transfer qilinadi. Eron chempionatidagi ikki yillik faoliyatidan so'ng futbolchi Toshkentga keladi va "Lokomotiv" klubi tarkibiga qo'shiladi. 2014 yilda yana "Neftchi"ga qaytgan Xolmatov jamoada ikki davomida o'ynaydi. 2016 yilda bir muddat Tojikistonning "Istiqlol" klubida o'ynaydi va shu yilning o'zidayoq yana "Neftchi" tarkibiga qaytadi. SHuningdek, u milliy chempionatlarimizda 2017 yilda "SHo'rtan", 2018 yilda "Iftixor" va 2019 yilda "RashMilk" klublarida ham o'ynagan. Ketma-ket hisoblab ko'rsak, Akmal Xolmatov o'zbek futbolida jami 20 yildan ko'proq vaqt mobaynida harakat qilgan ekan.

Artur Gevorkyan (Turkmaniston)

Turkmanistonlik legioner futbolchi Artur Gevorkyan o'zbek milliy chempionatlaridagi ishtirokini 2007 yilda G'uzorning "SHo'rtan" klubida boshlaydi. Turkmanistonning "Ashxobod" klubidan kelib qo'shilgan futbolchi "SHo'rtan"da 3 yil davomida o'ynaydi va 2010 yilda Toshkentning "Paxtakor" klubiga transfer qilinadi. "SHer"lar safida 1 yil davom etgan faoliyatidan so'ng Gevorkyan 2011 yilda "Nasaf"ga ko'chib o'tgan. Jami 5 yil mobaynida qarshiliklar safida o'ynagan legioner futbolchi 2016 yilda Toshkentning "Lokomotiv" va 2017-2018 yillarda Navoiyning "Qizilqum" klublari safida harakat qilgan. Siz ham hisob-kitob qilib ko'rgandirsiz, Gevorkyanning milliy chempionatlarimizdagi faoliyati jami 11 yil davom etgan.

Dragan CHeran (Serbiya)

Milliy chempionatlarimizda bir necha mavsumlardan buyon to'purarlik salohiyatini namoyish etib kelayotgan serbiyalik legioner futbolchi Dragan CHeran 2016 yilda "Nasaf"ga SHimoliy Makedoniyaning "Vardar" klubidan kelib qo'shilgan. Qarshiliklar safidagi 2 yillik muvaffaqiyatli faoliyatidan so'ng 2018 yilda Toshkentning "Paxtakor" klubi safiga ko'chib o'tgan. Yillar kesimida hisoblab ko'rsak, Dragan CHeran milliy chempionatlarimizda ketma-ket 8 mavsumdan buyon o'ynab kelmoqda.

Kaxi Maxaradze (Gruziya)

O'zbek futbolida legioner sifatida uzoq muddat faoliyat olib borganlardan yana biri Kaxi Maxaradze hisoblanadi. Gruziyalik futbolchi milliy chempionatlarimizdagi faoliyatini 2009 yilda Toshkentning "Lokomotiv" klubida boshlangan. 2009-2010 yilgi mavsumlarda ushbu klubda o'ynagan Maxaradze 2011 yilda Toshkentning yana bir klubi - "Paxtakor"ga o'tadi va bu jamoa safida 2015 yilgacha harakat qiladi. Kaxi 2016 yilda yana sobiq klubi "Lokomotiv"ga qaytgan. 2016-2018 yillada "temiryo'lchilar" tarkibida o'ynagan Maxaradze 2019 yilgi mavsumning Jizzaxning "So'g'diyona" klubiga ko'chib o'tgan. Gruziyalik futbolchi 2020 yilda "Lokomotiv"ga qaytgan va shu mavsumda milliy chempionatlarimizdagi faoliyatini yakunlaydi. Kaxi Maxaradzening o'zbek futbolidagi faoliyati jami 12 yil davom etgan.

SHuningdek, yana bir necha nafar legioner futbolchilar ham o'zbek futbolida faoliyat ko'rsatishgan yoki ko'rsatib kelishmoqda. Jumladan turkmanistonlik Gochkuli Gochkuliev ham 6 yil davomida milliy chempionatlarimizda o'ynagan. Yana serbiyalik legioner futbolchi Yovan Jokich ham 6 yildan buyon o'zbek futbolida faoliyat ko'rsatib kelmoqda.

Umumiy hisob-kitoblarga tayansak, bugunga qadar o'zbek futbolida eng ko'p vaqt davomida o'ynagan futbolchi Akmal Xolmatov bo'lib turibdi. Futbolchining milliy chempionatlarimizdagi faoliyati jami 20 yilu 6 oy mobaynida davom etgan.

Bekzod Tolibov tayyorladi.