4 ta seyv qilgan posbon, yirik g'alabada katta sahnaga chiqqan hujumchi, olisdan darvozani nishonga olgan yosh futbolchi - Superligada 1-tur laureatlari

Championat.asia sayti talqiniga ko'ra, 1-turning eng yaxshi darvozaboni – Abdumavlon Abdujalilov ("Bunyodkor")

"Bunyodkor" ilk turda OKMK bilan bahs yuritib, minimal g'alabaga erishdi. Bu g'alabada "qaldirg'ochlar" posbonining o'rni beqiyos bo'ldi. U olmaliqliklarning 5 ta aniq zarbasidan 4 tasini bartaraf etishga erishdi, shulardan yarmi o'ta xavfli vaziyatlar sirasiga kirardi. Shunday qilib, Abdumavlon Abdujalilov Championat.asia ijodkorlari tomonidan tur darvozaboni deb topildi.

Championat.asia sayti talqinida 1-turning eng yaxshi murabbiyi – Timur Kapadze ("Navbahor")

"Navbahor" dastlabki turda "Dinamo" mehmoni bo'lib, 2:1 hisobida zafar quchdi. Timur Kapadze mazkur baxs uchun to'g'ri taktikani tanladi va namanganliklarni oldinga boshladi. U tarjribali Vadim Abramov jamoasini engish orqali tur murabbiyi sifatida etrof etildi. 

Championat.asia sayti talqiniga ko'ra, 1-turning eng yaxshi futbolchisi – Dragan Cheran ("Andijon")

"Andijon" ushbu turda "Bobur Arena"da "So'g'diyona"ni 4:0 hisobida dog'da qoldirdi. Tajribali hujumchi Dragan Cheran mazkur uchrashuvda 70 daqiqa harakat qilib, birinchi gol urilishida jonbozlik ko'rsatdi va uchinchi golni esa aynan o'zi urdi. Uning maydondagi samarali harakatlari g'alabada muhim rol o'ynadi. Shu tariqa, Championat.asia xodimlari 38 yoshli futbolchini tur futbolchisi nomiga loyiq ko'rdi. 

Championat.asia sayti talqinida 1-turning eng chiroyli goli muallifi – Narimon Ahmadjonov ("Bunyodkor")

Yuqorida yozib o'tganimizdek, "Bunyodkor" bu turda OKMKni 1:0 hisobida mag'lubiyatga uchratdi. Qanot futbolchisi 63-daqiqada olis masofadan chap oyoqda darvozaning yuqorisini poyladi — raqib posboni zarbani bartaraf etishda shunchaki ojiz qoldi. Shu tariqa, 20 yoshli o'yinchi turning eng chiroyli goli muallifi deb topildi.