Oybek Rustamov: "Bosh hakam to'p o'ng qo'limga tekkanini qaerdan ko'rdi, o'zim ham hayronman"

Uning aytishicha, o'sha vaziyatda to'p uning o'ng qo'liga tegmagan va 11 metrlik nuqtani ko'rsatish uchun hech qanday asos bo'lmagan. 

- 6 ochkolik uchrashuv haqida fikrlaringiz...

- Qarshida qiyin bo'lishini bilgan holda o'yinga jiddiy tayyorgarlik ko'rgan edik. To'g'ri takidlab o'tdingiz, bu 6 ochkolik bahs edi. Ijobiy natija qayd etish nasib qilmagan ekan, mag'lubiyatga uchradik. Hayot davom etadi. Oldinda o'yinlarimiz bor. Bo'lajak uchrashuvlarga yaxshi tayyorgarlik ko'rishga harakat qilamiz.

- Hamma muhokama qilayotgan penalti bilan bog'liq vaziyatga oydinlik kiritib bersangiz. O'sha vaziyatda nima ro'y berdi? Hakam sizga nimalar dedi? 

- Bosh hakam to'p o'ng qo'limga tekkanini qaerdan ko'rdi, o'zim ham hayronman. Masofa yaqin edi, to'p chap qo'limga (chap qo'l tanaga yopishib turgani sababli penaltiga asos bo'lmaydi – tahr.) va keyin qornimga tegib ketdi. Agar o'ng qo'limga tekkanida to'p yo'nalishi o'zgargan bo'lardi. Endi nima ham deymiz. Nimaga asoslanib, bunday qaror qabul qilishdi, bilmayman. Agar darvoza ortidagi kameradan ko'rishganida, balki hammasi yaqqol ko'ringan bo'lardi. 

Qizig'i, bosh hakam qanot hakamiga qarab ish qildi. VAR'ni nega buncha uzoq ko'rdi, hayronman. Endi hammasi ularning insofiga bog'liq.