"Navbahor" ishtirokidagi o'yin sanasi o'zgardi

Avvalroq "Dinamo" O'zbekiston kubogi finalida o'ynay olmasligi aniq bo'lgan "Paxtakor" klubining xalqaro maydondagi ishtirokidan kelib chiqib, Superliga o'yinini ko'chirish yuzasidan bergan taklifiga rozi bo'lgandi. Endilikda Vadim Abramov boshchilik qilayotgan jamoa kubok finaliga yo'l olgan "Navbahor" bilan kelishuvga erishdi. 

5 oktyabr kungi final oldidan "Navbahor" Superliganing 14-turidan qolib kelayotgan "Dinamo"ga qarshi uchrashuvni o'tkazish uchun 30 sentyabr kuni Samarqandga tashrif buyurishi kerak edi. Finalning ikkinchi ishtirokchisi bo'lgan "Andijon" esa 25 sentyabr kuni o'z maydonida "Neftchi" klubini qabul qiladi. Liga taqvim shakllantirayotganda kubok finaliga kim yo'llanma olishi aniq bo'lmagan. Bunda "Surxon" va "Andijon" klublarining hamda "Navbahor" va "Paxtakor" klublarining finalga qadar bo'lgan yo'lida o'xshashlik mavjud edi (30 sentyabrda "Paxtakor" Elit CHempionlar ligasida, "Navbahor" Superliga qoldirilgan o'yinida ishtirok etishi belgilangandi). 

Final ishtirokchilari aniq bo'lgach, "Navbahor" "Dinamo" bilan bellashuv sanasini ikkinchi bor qayta o'zgartirishni so'radi (avvalroq klub kubok chorak finalidan o'rin olgan "So'g'diyona" bilan o'yin oldidan "Dinamo"ga qarshi to'qnashuv sanasini ko'chirishni so'ragandi). Taqvimdagi zichlikdan kelib chiqib, Liga mazkur so'rovni qabul qilmadi. Bellashuvni ko'chirish imkoniyati u faqatgina FIFA kunlaridan birida o'tsagina mavjud edi. Natijada "Dinamo" va "Navbahor" oktyabr oyidagi FIFA kunlarida o'ynashga kelishib oldi. Endilikda Samarqanddagi o'yin 12 oktyabr — shanba kuni bo'lib o'tadi. Terma jamoaga azo futbolchilarning Superliga 14-turidan qolib kelayotgan uchrashuvda ishtirok eta olmasligi har ikki klub tomonidan qabul qilindi. 

Liga final yoki xalqaro uchrashuvlari bor bo'lgan klublar taqvimini qulayroq qilish masalasiga u reglament talablariga zid bo'lmagani holda ruxsat etadi. Bu o'zgarishlar klublar ishini qulayroq qilish uchun bo'lib, bu bilan Liga yoki translyaciya huquqiga egalik qiluvchi kompaniya rejalarida katta o'zgarishlar kuzatilmaydi.