Misr darvozasiga supergol urgan G'aniev fleshmobni davom ettirdi yoxud Tursunovga "javob"

"Bugungi o'yindan oldin do'stlarim, akalarim Doston Tursunov, Odil Hamrobekov, Javohir Sidiqov gol urishimni aytib, omad tilashgandi. Xudoga shukur, niyatlari ijobat bo'lib Misr darvozasiga gol urishga muvaffaq bo'ldim. SHu boisdan bugungi golimni Odil Hamrobekov, Doston Tursunov va Javohir Sidiqovga bag'ishlayman. 

Bugungi o'yin davomida bizlarni qo'llab-quvvatlab turgan muxlislarga katta rahmat deyman. Andijondagi stadionda chinakamiga chiroyli muhit hukmronlik qildi. Aynan ularning daldasi meni ilhomlantirib yubordi. Kelgusi o'yinlarda ham muxlislarimizni xursand qilishga harakat qilamiz", - deya o'yin haqidagi fikrlarini bildirdi Aziz G'aniev.

Qayd etish kerakki, kuni kecha O'zbekiston terma jamoasi safida debyut golini KXDR darvozasiga urgan Doston Tursunov ham saytimiz orqali golini Hamrobekov, G'aniev va Sidiqovga bag'ishlab, o'yindan avval aynan ular Dostonga gol urishi haqida ishonch bildirishganini gapirgandi. Endi esa Aziz G'aniev mazkur o'ziga xos fleshmobni davom ettirgan holda Doston Tursunovga qaysidir manoda javob qaytardi. 

Umid qilamizki, bu yoqimli anana, fleshmob terma jamoalarimiz ishtirokidagi o'yinlarda hali uzoq davom etadi.

Eslatib o'tamiz, bugun Andijonda o'tgan o'rtoqlik uchrashuvida O'zbekiston hamda Misr olimpiya terma jamoalari o'zaro kuch sinashishdi va mazkur bellashuvda vakillarimiz "Nasaf" azolari Bobir Abdixoliqov va Azizjon G'anievning gollari evaziga g'alaba qozonishdi.