Vadim Abramov: "Muxlislarimiz uydagi g'alabani sog'inib qolishgandi"

- O'yin haqida fikringiz?

- Samarqandda uzoq kutilgan g'alabani qo'lga kiritdik va bu bilan muxlislarni tabriklayman. Bizni qo'llab turgan va stadionga kelgan hammaga rahmat. Uchrashuvga keladigan bo'lsak, bugun juda yaxshi jamoa bilan o'ynadik. OKMK raqobatli jamoa, chempionat etakchilaridan biri. Shu bois g'alaba qozonganimiz ikki karra xursand qildi. Yigitlar ko'p kuch sarflashdi, endi keyingi bahs uchun tezrok tiklanmasak bo'lmaydi.

- OKMK ayniqsa oxirgi daqiqalarda yaxshi futbol namoyish etib gol urib ketadi. Bugun ham shunday bo'lishi mumkin edi, ammo jamoangiz yaxshi himoyalana oldi.

- Biz raqibning standartlarda kuchli ekanini bilardik, shu bois "ikkinchi qavat"da yaxshi o'ynaydigan futbolchilarni tushirdik. Yana bir bor futbolchilarimizga rahmat, 20 avgust kuni yana maydonga tushamiz va shu o'yinda ham bor kuch bilan harakat qilishlarini tilab qolaman.

-  Bugun tarkibda rotaciyaga qo'l urdingiz. Bu nima bilan bog'liq?

- Har o'yindan oldin raqibni o'rganib chiqqan holda tarkibni belgilaymiz. Bilasiz, asosiy darvozabonimiz bo'yi unchalik baland emas. OKMKda bosh bilan yaxshi o'ynaydigan futbolchilar borligini inobatga olib, darvozaga Edem Nemanovni qo'ydik. Boshqa chiziqlarga ham shunday o'zgarishlarni qildik.

- Viloyat hokimi bilan gashlaganingizda yangi stadion va baza haqida gap borgandi.

- Viloyat hokimimizga katta rahmat, "Dinamo" uchun hamma sharoitni qilib beryapti. O'ylashimcha, shu yilning o'zida yangi bazamiz foydalanishga topshiriladi. Hammasi sekin-asta bo'ladi. 

- Ulug'bek Hoshimovning jarohati haqida

- Uning tezroq sog'ayib ketishidan umidvorman. "So'g'diyona" bilan o'yingacha tayyor bo'lishini jamoa shifokorlari bilan maslahatlashib hal qilamiz.

- Turnir jadvalida juda zich holat yuzaga kelgan. "Dinamo"ning imkoniyatlari qanday deb o'ylaysiz? Har holda byudjet tomonlama bizdan ancha yuqori jamoalar bilan bellashishga to'g'ri keladi.

- Maydonda pul futbol o'ynamaydi, futbolchilar futbol o'ynaydi. Biz ham eng yaxshisiga umid qilamiz. Mavsumni "Nasaf" bilan o'ynab yakunlaymiz. Bu oxirgi o'yinimiz bo'ladi va shu uchrashuvda ham ko'p narsa hal bo'lib ketishi mumkin.

- Stadiondagi muhit haqida

- Men muxlislarimizni tabrikladim. Bugun stadionda juda yaxshi muhit hukmron surdi. Ishqibozlar 12-o'yinchidek o'zlarini tutishdi. Muxlislar bizga doim ko'mak berib turishadi. Muxlislik borasida Samarqand alohida ajralib turadi, muxlislar bizni qo'llagani stadionga kelishadi va o'z navbatida biz ham ular oldidagi masuliyatni his qilamiz. Shu bois ham matbuot anjumanini o'z maydonimizda uzoq kutilgan g'alaba bilan boshladim, chunki ishqibozlar uydagi yutuqni sog'inib qolishgandi.