Lochin Guldaev topilmalari yoxud O'zbekiston U-23 tarkibidagi andijonlik futbolchilar haqida ikki og'iz

Quvonarlisi O'zbekiston U-23 terma jamoamiz yaponiyalik tengqurlariga qarshi kechgan bahsda 2:0 hisobida ishonchli g'alabani qo'lga kiritib, finalga yo'l oldi.

Ushbu tarixiy g'alabaga aylangan o'yin nafaqat O'zbekiston uchun balki Andijon futbol akademiyasi uchun ham alohida ahamiyat kasb etadi desak mubolag'a bo'lmaydi. Sababi ushbu dargohda futbolning ilk sir-asrorlarini o'rgangan himoyachi Odilbek Abdumajidov bilan hujumkor yarim himoyachi Alisher Odilov bugun terma jamoa safida maydonga tushib, mamlakatimiz sharafini munosib himoya qildi. Ayniqsa Abdumajidov butun o'yin davomida mudofaa chizig'ida bexato xarakat qilib, raqib o'yinchilariga imkoniyat bermadi. SHuningdek zaxiradan maydonga tushgan Alisher Odilov ham o'ng qanotda tezkor xarakatlarini ishga solib, yaponiyaliklarni sarosimada ushlab turdi.

Abdumajidov va Odilov yuqorida aytib o'tganimizdek Andijon futbol akademiyasi tarbiyalanuvchilari hisoblanadi. Kezi kelganda shuni ham aytib o'tish o'rinliki, U-23 terma jamoamizning ushbu ikki nafar azosi murabbiy Lochin Guldaev shogirdlari hisoblanadi. 

"Rostini aytsam, U-23 terma jamoamizning musobaqadagi har bir uchrashuvini yuqori ishtiyoq va katta xayajon bilan kuzatib bordim. Albatta terma jamoamiz tarkibida ikki nafar shogirdim o'rin olgani meni juda quvontirdi. Odilbek va Alisher bilan doimiy aloqada bo'lib turamiz. Har bir o'yindan avval ularga masofadan turib bo'lsada, omad tilab, duoda bo'lamiz. Barakalla, yigitlar o'zlarini har tomonlama ijobiy ko'rsata oldi. Yaponiya bilan o'yinni Andijon futbol akademiyasida bugungi kundagi shogirdlarimiz bilan katta ekran orqali kuzatib bordik. 2:0 hisobidagi g'alaba barchamizni to'lqinlantirib yubordi. Men o'z shogirdlarim bilan faxrlanaman", - deydi Lochin Guldaev.

Malumot uchun, Alisher Odilov Andijon viloyatining Oltinko'l tumanida tavallud topgan. Hozirda Olimpik jamoasi sharafini himoya qilayotgan bo'lsa Odilbek Abdumajidov Andijon shahrida tug'ilgan. Markaziy himoyachi faoliyatini Qozog'istonning "Ordabasi" klubida davom ettirmoqda.