Orlov zamonaviy sharhlovchilar haqida: "Noto'g'ri urg'ular quloqqa g'alati eshitiladi. Bazida o'yindan juda katta chalg'ishlar bo'ladi. Efirda keraksiz so'zlar ko'p bo'lmasligi kerak"

"Sharhlovchilar yaxshilandi, lekin familiyalarni aytishni xohlamasdim. Aks holda: "Orlov falonchiga qarshi" degan sarlavhalar paydo bo'ladi. Bu kerak emas. Men shunchaki hamkasblarimga kasbimiz tayanadigan o'sha uchta asosni eslatib o'tmoqchiman.

Birinchisi – bu rus tili. So'zlardagi noto'g'ri urg'ularning ko'pligi quloqqa yoqmaydi. Inobatga oling, sharhlovchilar, sizni filologlar ham, rus tili o'qituvchilari ham va, ayniqsa, bolalar tinglashadi. Sovet televideniesida barcha yo'nalishlar bo'yicha jiddiy tanlov bo'lardi. Shuning uchun ham boshlovchilar, diktorlar to'g'ri gapirishardi. Hech kim xato talaffuz qila olmasdi, hozir esa hatto federal kanallarda ham buni tez-tez eshityapman. Bu Gorbachyov davridan boshlangan. Mixail Sergeevich ko'p gapirardi, lekin rus tilida – yomon gapirardi. Aytgancha, Volodya Stognienkoning rus tili yaxshi. U hozir Okko'da sport bo'yicha rahbar va xodimlarni yo'naltirib turgani ko'rinib turibdi. Ushbu platforma tufayli bizda yana bir guruh qiziqarli sharhlovchilar paydo bo'ldi.

Ikkinchisi. Futbol reportaji janri futbol maydonida nima sodir bo'layotgani haqida gapirishni nazarda tutadi. Bizda esa bazida o'yindan juda katta chalg'ishlar yuz beradi. Tabiiyki, hamma o'yinlarga, reportajlarga tayyorgarlik ko'radi – barakalla. Internet ko'plab imkoniyatlarni ochmoqda. Lekin sovet sharhlovchilarida ham qoida bor edi: qisqalik – talantning singlisi. Efirda keraksiz so'zlar (so'z musori) ko'p bo'lmasligi kerak. Sen o'yinning nozik jihatlari haqida gapirishga harakat qil – eng muhimi shu!

Uchinchi asos – xayrixohlik. Men doimo buyuk Nikolay Nikolaevich Ozerov 1973 yilda menga ochib bergan mashhur formulani targ'ib qilaman. O'HJ – o'zaro hurmat jamiyati. Efirda sharhlovchilar o'rtasidagi bunday munosabat ayniqsa muhim. Televizor qarshisida xushmuomala odamlar ishlayotgani tomoshabinlarga yoqadi.

Shubhasiz, bizning ishimizda mavzuni bilish juda muhim. Ammo hatto xizmat ko'rsatgan sport ustalari Maslachenko va Mayorov ham hech qachon murabbiylarga aql o'rgatishga yo'l qo'yishmagan. Bu taqiqlangan ish hisoblanardi. Bugun men go'yoki taktika noto'g'ri tanlangan degan davolarni eshitsam: "O'rtoq sharhlovchilar, odob saqlang, bunday qilish kerak emas. Sizning vazifangiz boshqa – futbolni targ'ib qilish", deb hayqirgim keladi. "Mazali" vaziyatlarni ilg'ab olish kerak, lekin kamchiliklar haqida ham gapirish lozim – aynan kim xato qilganini", – dedi Orlov.