Bugun futbol. "Lokomotiv" - "Navbahor"

Amaldagi chempion "Lokomotiv" o'z maydonida "Navbahor"ni qabul qiladi. O'yin 18:00da boshlanadi. Mazkur bahs "Navbahor"ning yangi bosh murabbiyi Andrey Kanchelskis uchun safardagi ilk uchrashuv bo'ladi.

Ikkinchi bosqich turnir jadvalida "Lokomotiv" 30 ochko bilan peshqadamlik qilmoqda. "Navbahor" esa 24 ochko to'plagan holda "Paxtakor"dan keyin uchinchi o'rinni egallab turibdi. Ikkinchi bosqichda to'rtta o'yin o'tkazgan "Navbahor" faqat bittasida g'alaba qozondi. Jamoa o'tgan tur o'z maydonida "Buxoro"ni 1:0 hisobida mag'lub etdi.

Jamoa avvalgi uchta bellashuvda g'alaba qozona olmadi: ikkita durang va bir mag'lubiyat. Natijada Ilhom Mo'minjonov istefoga chiqib yangi murabbiy tayinlandi. Toshkentda bo'lib o'tgan birinchi bosqich o'yinida "Lokomotiv" bugungi raqibini 3:1 hisobida mag'lub etgandi. Namanganda esa maydon egalari 2:0 hisobida zafar quchishgan.

"Lokomotiv" ikkinchi bosqichni dadil boshladi va davom ettiryapti. Jamoa bungacha o'tkazilgan to'rtta o'yinning hammasida g'alaba qozongan. "Temiryo'lchilar" navbati bilan "Metallurg", "Bunyodkor", "Buxoro" va "Paxtakor"ni mag'lub etishdi. Qizig'i shundaki, oxirgi ikkita bahsni safarda o'tkazgan "Loko" bir xil 3:1 hisobida zafar quchdi.

Xo'sh, sizningcha bugun bo'lib o'tadigan "Lokomotiv" - "Navbahor" qarama-qarshiligida kimga omad kulib boqadi va qanday hisob qayd etiladi?