Akaki SHulaya va boshqalar. Superligada 3-turning eng yaxshilari

"Championat.asia" sayti talqiniga ko'ra, 3-turning eng yaxshi darvozaboni - Abdumavlon Abdujalilov ("Lokomotiv").

"Lokomotiv" bu tur amaldagi chempion "Paxtakor"ga qarshi o'ynadi va 3:0 hisobida yirik g'alabaga erishdi. Uchrashuv davomida "temiryo'lchilar" posboni Abdumavlon Abdujalilov 5ta seyv ijro etdi va darvozasi dahlsizligini saqlab qoldi. Uning ishonchli o'yini sheriklariga ham qo'shimcha kuch bag'ishlagani turgan gap.



"Championat.asia" sayti talqiniga ko'ra, 3-turning eng yaxshi murabbiyi - Aleksandar Stoymirovich ("Lokomotiv").

"Lokomotiv"ning sensacion g'alabasida murabbiyning hissasi katta bo'ldi. O'yin davomida "temiryo'lchilar" kuchli pressing va tezkor qarshi hujumlar bilan "sherlar"ni esankiratib qo'yishdi. "Paxtakor" 2020 yil noyabr oyidan buyon Superligada hech kimga yirik hisobda yutqazmayotgandi. SHu tariqa, Aleksandar Stoymirovich 3-turning eng yaxshi murabbiyi deb topildi.



"Championat.asia" sayti talqiniga ko'ra, 3-turning eng chiroyli goli muallifi - Akaki SHulaya ("Qizilqum").

"Qizilqum" mazkur tur Qarshida "Nasaf" mehmoni bo'ldi. Uchrashuvning 64-daqiqasida SHukurullaev uzatgan ajoyib pasdan keyin SHulaya o'ng qanotda to'pni egallab ikki raqibdan qochib ketib Nematov qo'riqlayotgan darvozaga gol urdi. Aynan mana shu gol 3-turning eng chiroyli goli deb topildi. VIDEONI KO'RISH



"Championat.asia" sayti talqiniga ko'ra, 3-turning eng yaxshi futbolchisi - Mirjahon Mirahmadov ("Bunyodkor").

Dastlabki ikki turda ikkita mag'lubiyatni qabul qilib olgan "qaldirg'ochlar" murabbiylar shtabida o'zgarish ro'y berdi. 3-turda esa jamoani "Navbahor" kutib turgandi. Ko'pchilik bu o'yinda ham "Bunyodkor" yirik hisobda mag'lub bo'lishini taxmin qilgandi, ammo ikkinchi taymda maydonga tushib ikkita gol urgan Mirjahon Mirahmadov bu taxminlarni chilparchin qildi. Superligadagi faoliyatida beshinchi bor dublga erishgan Mirahmadov 3-turining eng yaxshi futbolchisi deb topildi.