"Yaxshi o'yin bo'ldi. Oxirigacha kurashdik. Qayerdan offsayd topishdi bilmayman. Uch ochkodan mahrum bo'ldik. Offsayd chizig'i deb, chiziqni darvoza ortidan chizishmoqda. U yerda hech qanday o'yindan tashqari holat yo'q. Menimcha, vaziyatni hamma ko'rdi. Yigitlarga rahmat deyman. Ular oxirigacha kurashdi", - deya gap boshladi Kamoliddin Tojiev.
- Takroriy holatni ko'rdingizmi? Sababi o'yin vaqtida hissiyotlarga berilgan bo'ladi. O'yindan so'ng takrorda esa vaziyatni xotirjam ko'rib olib, yakuniy xulosaga kelinadi...
- Ko'rdim. O'zimizning kameradan ko'rdik. U yerda umuman offsayd yo'q edi. Offsayd chizig'ini darvoza ortida chizsa ham offsayd yo'q. Takroriy vaziyatni ko'rdik.
- 90 daqiqa davomida "Paxtakor" 2-3ta gol urib qo'yganida ushbu bahsli vaziyat umuman ahamiyatsiz bo'lib qolar edi...
- Yaratgan vaziyatlarimizdan unumli foydalana olmadik. Barcha jamoalar "Paxtakor"ga qarshi 200% kurashadi. Shuning uchun biz ham qiynaldik va yana vaziyatlardan unumli foydalanmadik.
- "Surxon" kabi jamoalarga qarshi ikki nafar hujumchi bilan o'ynatsa bo'lmasmidi?
- Biz hujumchi ortida yana bir futbolchini o'ynatamiz. U ham hujumchi sifatida hisoblanadi.
- "Neftchi" bilan Kubok o'yini bor. Undan oldin esa "Dinamo"ga qarshi o'yin. "Dinamo"ga qarshi o'yinda rotaciya bo'ladimi?
- Hozir faqat "Dinamo"ni haqida o'ylaymiz.
- OCHLga qur'a tashlandi. "Paxtakor" o'tgan safar Saudiya jamoalaridan ko'ra qatarliklar bilan o'ynagan edi. Qur'a natijasidan qoniqdingizmi?
- Biz yulduzlarga qarshi o'ynaymiz. Kuchlilarga qarshi o'ynashimiz yaxshi-ku. Muxlislarimiz ham katta yulduzlarni ko'rishadi. Umuman olganda, qiziqish ortadi.
- Yangi futbolchilarning bugungi o'yiniga qanday baho berasiz?
- Murtazo jarohat oldi. Ayman ham yaqindagina jarohatdan qutulgan edi. Nasib bo'lsa, ikki futbolchi ham tez orada eng yaxshi sport formasiga kirib oladi.
