Biroq yakuniy pallada hamyurtimizning Qozog'iston va Rossiya bilan o'yinlarda ishtirok eta olmasligi ma'lum bo'ldi. Esingizda bo'lsa, Jaloliddin Masharipov sentyabr oyidagi Kamerun va Kosta-Rika bilan uchrashuvlarni jarohat sabab o'tkazib yuborgandi. Barchasiga aniqlik kiritish uchun bugungi uchrashuvdan so'ng yarim himoyachiga yuzlandik.

- Qozog'iston va Rossiyaga qarshi o'yinlarda maydonga tushmaysiz. Ayni paytdagi holatingiz qanday? Batafsil izoh bera olasizmi?

- Bu yig'inlarga taklif qilingandim. Lekin jarohatdan qaytganimga 20 kundan oshdi. Jismoniy tarafdan to'liq tayyor emasligim uchun klubim ruhsat bermadi. Umid qilamanki, navbatdagi yig'inlarga tayyor bo'laman.

- Bugungi uchrashuvni maydon tashqarisidan kuzatdingiz. Bunda taassurotlar doim boshqacha bo'ladi. Qozog'istonga qarshi o'yin haqida qanday xulosalaringiz bor?

- O'yindan avval taxmin qilgandim. Qozog'iston bizdan kuchli bo'lmagan. Lekin bilmadim nima uchun odamlar bunchalik vahima qilib tashlashdi. Kamerun va Kosta-Rika bilan ham bemalol o'ynay olishimizni avvalgi intervyuda takidlagandim. Keyingi raqibimiz Rossiya. Tarkibida yoshlar ko'p ekan. Yutsa bo'ladigan jamoa. Ortiqcha vahimaga o'rin yo'q.

- Ijobiy natijalar faqat o'rtoqlik o'yini fonida shunday ko'rinyaptimi? Rasmiy uchrashuvlarda terma jamoamiz o'zgarib qolmaydimi?

- Barchasi o'rtoqlik bahslaridan boshlanadi. Rasmiy turnirlarda ham shunday o'yin ko'rsatishga harakat qilamiz.

- Joriy yilgi Superligani kuzatdingizmi?

- Esingizda bo'lsa, yil boshida aytgandim. "Nasaf" har yili shov-shuv qiladi, ammo yakunda baribir 2-3 o'rinni oladi. Kubokni nazarda tutmaganman. Shunday bo'lib chiqdi. Oxirigacha chempionlikka kurashib kelishdi. Oxiri "Paxtakor" chempionlikni qo'lga kiritdi.

- "Paxtakor"ning chempionligi g'oliblik ruhiyati bilan bog'liqmi?

- "Paxtakor" barqaror o'yin ko'rsatadi. Garchi kubokda "Navbahor"ga, uyda "Nasaf"ga yutqazgan bo'lsada, chempionatda muhim bahslarda yutishni biladi.

- Superligadagi intriga nimaning hisobiga yuzaga keldi, deb o'ylaysiz?

- Fikrimcha, "Paxtakor"ning biroz kuchsizlangani bilan bog'liq. Oldingidan pasaygan. "Nasaf" "Paxtakor"ning darajasiga chiqqani yo'q. "Paxtakor" ularning darajasiga tushdi.

- Klubingizdagi faoliyatingiz qanday ketyapti?

- Hammasi a'lo darajada. Rudi Garsiya bilan ishlayapmiz. Jahon chempionatidan keyin chempionat yana boshlanadi.

- Qatardagi mundialda kimga muxlislik qilasiz?

- Yoshligimdan Braziliyaga muxlisman.

- Osiyo terma jamoalarining imkoniyatlarini qanday baholaysiz? Deylik Saudiya Arabistonini?

- Saudiya Arabistoni qiyin guruhga tushgan. Ular mag'lubiyatga uchrasa ham chiroyli futbol ko'rsatadi, deb o'ylayman.

Jaloliddin Masharipov: "Qozog'iston bizdan kuchli bo'lmagan"