Жаҳон ампутантлар футболи федерацияси томонидан ташкил этиладиган мусобақада тўрт қитъадан саралаш босқичлари орқали йўлланма олган 24 та миллий терма жамоа иштирок этади. Қуръа натижаларига кўра, жамоалар тўрттадан олтита гуруҳга тақсимланди.
Беш карра жаҳон чемпиони ҳисобланган Ўзбекистон терма жамоаси "E" гуруҳидан жой олди. Ҳамюртларимиз 14 ноябрь куни АҚШга қарши илк учрашувини ўтказади. 15 ноябрда Уругвай, 16 ноябрда эса Марокаш терма жамоаси билан куч синашади. Учрашувлар саналари Мексика маҳаллий вақти бўйича келтирилган.
Мусобақа регламентига кўра, ҳар бир гуруҳда дастлабки икки ўринни эгаллаган жамоалар, шунингдек, учинчи ўрин соҳиблари орасидан энг яхши натижа қайд этган тўртта терма жамоа нимчорак финалга йўл олади.
Маълумот учун, Ўзбекистон ампутантлар терма жамоаси жаҳон футболида бой тарих ва катта тажрибага эга. Ҳамюртларимиз 1990, 1991, 2007, 2010 ва 2012 йилларда жаҳон чемпионлигига эришган. Хусусан, 2007 йил Туркияда, 2010 йил Аргентинада ва 2012 йил Россияда ўтказилган дунё биринчиликларида кетма-кет уч марта бош соврин қўлга киритилган.
2022 йили Туркиянинг Истанбул шаҳрида бўлиб ўтган сўнгги жаҳон чемпионатида эса Ўзбекистон терма жамоаси бронза медалига сазовор бўлган. Ўша мусобақада мезбон Туркия чемпионликни қўлга киритган, Ангола терма жамоаси иккинчи ўринни эгаллаган.
Ўзбекистон терма жамоаси 2025 йилда қитъа миқёсида ҳам эътиборли натижалар қайд этди. Февраль ойида Бангладеш пойтахти Даккада ўтказилган Осиё чемпионати финалида Индонезияни 6:0 ҳисобида мағлуб этиб, чемпионлик унвонини қўлга киритди. Ноябрь ойида Индонезиянинг Жакарта шаҳрида ташкил этилган, жаҳон чемпионатига саралаш вазифасини ҳам бажарган Осиё кубогида эса финалга қадар етиб борди. Ҳал қилувчи баҳсда Эронга 1:2 ҳисобида имкониятни бой берган жамоамиз кумуш медаль билан бирга жаҳон чемпионати йўлланмасини қўлга киритди.
Таъкидлаш жоиз, ампутантлар ўртасидаги жаҳон чемпионати саккиз йиллик танаффусдан сўнг яна Мексикада ташкил этилади. Ушбу мамлакат 2018 йилги мусобақага ҳам мезбонлик қилган бўлиб, ўшанда Ангола терма жамоаси чемпионликни қўлга киритган эди. 2026 йилги жаҳон чемпионатига эса Туркия амалдаги чемпион сифатида ташриф буюради.
