- Ўйин ҳақида фикрингиз?
- Биринчи навбатда Бекободдан шунча йўл босиб келган мухлисларимизга миннатдорчилик билдираман. Ишқибозларимиз жамоани яхши қўллаб туришди. Сафарда оғир ўйин кечишини билардик. "ФарДУ" яхши шаклланган жамоа, ҳужумкор футбол намойиш этади. Менимча, бу "ФарДУ"нинг охирги 11-12 турдан бери илк мағлубияти бўлса керак. Рақибни яхши ўрганиб чиққандик, футболчиларга кучли-кучсиз томонларини кўрсатиб бергандик. Негадир бизга руҳий ҳолат панд беряпти. Гол уриб олганимиздан сўнг орқага ўтиб оляпмиз. Шунинг учун иккинчи бўлимда тўпни рақибга бериб қўйдик. Йигитларга раҳмат, берилган кўрсатмаларни тўғри бажариб, шунинг эвазига уч очко олдик.
- Мавсумнинг маълум бир қисмидан кейин жамоани қабул қилиб олдингиз. Сиз билан тузилган шартнома муддати ва олдингизга қўйилган вазифа ҳақида?
- Иккинчи давра старт олиб тўрт-беш тур ўтгач жамоани қабул қилиб олдим. Ҳозирча мавсум охирига қадар синов муддати асосида ишлаяпман. Олдимизга қўйилган вазифани бажаришимиз керак. Йил охирида раҳбарият ким ишлаш-ишламаслигини ҳал қилади. Жамоага келганимдан бери ҳали мағлуб бўлмадик. Тўққизта ўйинда майдонга тушган бўлсак, 8 ғалаба, бир дуранг қайд этдик. Буни яхши кўрсаткич деб ўйлайман. Ҳаммаси осон кетишининг сабаби Илҳом Ибрагимович Мўминжонов пайтида ҳам жамоада эдим ва ёрдамчи мураббий бўлиб ишлаб келаётгандим. Шу боис жамоага кўникиш мен учун осон кечди.
- Жамоада айнан нимани ўзгартирдингиз?
- Иккинчи давра олдидан ҳам сифатли футболчиларни таклиф этдик. Биринчи даврада ҳам таркибимиз кучли эди, лекин иккинчи даврада янаям кучайдик деб ўйлайман. Аввало футболчиларнинг руҳиятини кўтаришга, кейин эса жамоани бирлаштириш устида иш олиб бордик. Бир жамоага айланганимиз ўйинларда қўл келяпти. Жамоамиз ҳам майдонда, ҳам майдон ташқарисида жуда аҳил.
- Агар "Металлург" Суперлигага чиқса, бош мураббийдан Про лицензияси талаб этилади. Сизда Про лицензия борми?
- Ҳозирча менда йўқ. Менимча, Суперлигада "А" лицензия билан ҳам ишласа бўлса керак. Ўқиш ниятим бор, ҳужжат топширганман, фақат курслар бошланишини кутяпман. Ўйлашимча, Суперлигада ҳам бемалол мураббийлик қила оламан. Сабаби 2024 йил 6-7 тур қолганида жамоа ўзимга қолиб кетганди. Ўшанда раҳбарият қўйган вазифани бажариб, Суперлигада жон сақлаб қолгандик. Бу ҳам кичкина иш эмас. Анча пайтдан бери жамоа ичидаман, испаниялик, черногориялик мураббийлар билан ишладим. Улар билан ишлаб кўп нарса ўргандим. Хуллас, ўзимни Суперлиганинг исталган жамоасида ишлашга тайёр деб биламан.
