Аввалроқ "Ал Насср"нинг 41 ёшли форварди мураббий Жорже Жезуш УЕФА Миллатлар лигасининг Норвегияга қарши ўйинида (2:1) уни майдонга туширмаганидан сўнг ўзбошимчалик билан терма жамоа қароргоҳини тарк этган эди. Ушбу қилмиши учун федерация ўйинчини бир ойга четлатиб, 255 евро миқдорида жаримага тортди.
"30 сентябрь куни Криштиану Роналду Дания – Португалия ўйини олдидан ўтказиладиган расмий машғулот бошланмасидан аввал миллий терма жамоанинг ўқув-машғулот йиғинини тарк этди. У машғулотнинг ўзига ҳам, ундан кейинги кечки овқатга ҳам келмади. Роналду миллий терма жамоалар директоридан сўраб олган автомобилидан фойдаланиб, ўз ташаббуси билан кетиб қолди. Шу билан бирга, у Федерация ёки терма жамоа мураббийлар штаби вакилларидан ҳеч кимни олдиндан огоҳлантирмаган.
Стадиондан кетганидан сўнг Криштиану Роналду телефон орқали сўзлашувда Федерация президентига миллий жамоа йиғинини тарк этиш қарори ҳақида тўғридан-тўғри маълум қилиб, бундан буён унинг фаолиятида иштирок этмоқчи эмаслигини тушунтирган", — дейилади федерациянинг интизом кенгаши қарорида.
Интизом кенгаши нашрида қайд этилишича, Роналду ўз хулқ-атворининг "учта енгиллаштирувчи ҳолатини" кўрсатиб ўтган: "футбол ривожига қўшган салмоқли ҳиссаси", "спорт хизматларининг мавжудлиги" ва ушбу ишда "ҳақиқатни қарор топтиришга қўшган ҳал қилувчи ҳиссаси". Федерация дастлабки икки далилга рози бўлди, аммо охиргисини рад этди: "Фактларнинг катта қисми очиқ манбаларда мавжуд бўлиб, бу узоқ ва мураккаб суриштирув ўтказиш заруратини истисно қилади".
Кенгаш қарорида таъкидланишича, қолган икки енгиллаштирувчи ҳолат ҳақиқатан ҳам қўлланилиши мумкин. шунингдек, қарорга Роналдунинг жорий мавсумда ва ундан олдинги учта мавсумда федерация томонидан бошқа интизомий жазолари бўлмагани ҳам таъсир кўрсатган.
