Аввалроқ Жуд Беллингем ва Антонио Рюдигер ўйин якунланганидан сўнг можаро иштирокчиларига айлангани ҳақида маълумот пайдо бўлган эди. Икки жамоа ўйинчилари ўртасида кийиниш хонасига бориш йўлагида муштлашув келиб чиққани хабар қилинганди. Эмишки, Беллингем хавфсизлик ходимларидан бирига зарба берган, Рюдигер эса бошқасининг юзига тарсаки туширган. À Punt журналисти Начо Санчеснинг маълумотларига кўра, жабрланган қўриқчилар бош ҳакам Франсиско Эрнандес Маэсога мурожаат қилиб, ҳолатни қайд эттиришган. Беллингем ва Эдер Милитао "Валенсия" футболчилари манзилига ҳақоратли сўзлар айтган ҳолда йўлак томон йўл олишгани таъкидланган эди.
Marca нашри маълумотларига кўра, барчаси "Валенсия" спорт директори Браулио Васкеснинг бош ҳакам биринчи ёрдамчисига кескин норозилик билдиришидан бошланган. "Бу фол эмас, тоза яккакураш — ақл бовар қилмайди!" — дея бир неча бор хитоб қилган функционер.
Беллингем Браулионинг костюмидан тортганида вазият янада кескинлашган — эҳтимол, у функционерни ҳакам ёрдамчисидан узоқлаштиришга уринган. Шундан сўнг уч нафар хавфсизлик хизмати ходими аралашиб, "Реал" ўйинчиларини кийиниш хонаси эшиклари томон сура бошлаган. Юзага келган тартибсизликда муштлашув бошланган: ходимлар можаро томонларини ажратишга уринаётган вақтда Рюдигер хавфсизлик хизмати вакилининг юзига зарба берган. Ҳимоячи буни қасддан ёки тасодифан қилганига аниқлик киритилмаган. Конате можаро иштирокчиларини бир неча бор: "Хотиржам бўлинг!" дея тинчлантиришга уринган.
Конфликт шундан сўнг давом этмаган, бироқ хавфсизлик хизмати ходимлари бош ҳакамга "Реал" марказий ҳимоячиси томонидан ҳужумга учраганликларини маълум қилишган. "Валенсия"да юз берган ҳолатнинг видеоёзуви мавжуд ва клуб бу инцидент нега ўйиннинг расмий баённомасида акс эттирилмаганидан ҳайратда. Ёзувда футболчилар ўзаро туртиниб, зарбалар алмашаётгани яққол кўринади.
Ҳакам Франсиско Эрнандес Маэсо ўз баённомасида ушбу воқеалар ҳақида ҳеч нарса эслатиб ўтмаган, фақатгина Браулионинг норозилигига эътибор қаратган.
"Ўйин танаффуси вақтида трибуна ости йўлагида "Валенсия" спорт директори Браулио Хесус Васкес Бенитес ушбу ҳудудда бўлган ва можарога аралашган. У менинг биринчи ёрдамчим билан тортишиб қолиб, унга бир неча бор баланд овозда шундай сўзлар билан мурожаат қилди: "Бу фол эмас, бу фол эмас! Ақл бовар қилмайди!" Бундан ташқари, мен унинг ёнидан ўтаётганимда у кўп бор менга юзланиб, бир хил гапларни асабий тарзда такрорлади. Юзага келган вазиятда Миллий полиция ходимларининг аралашуви талаб этилди: улар унинг шахсини аниқлашди ва шундан сўнг воқеага барҳам бериш мақсадида унга нисбатан мажбурий чоралар қўллашга ҳамда уни бу ҳудуддан олиб чиқиб кетишга мажбур бўлишди", — дейилади арбитр баённомасида.
