Nukusliklar bugun Oltiariqning "Do'stlik" klubi bilan chempionatdagi navbatdagi tur uchrashuvini o'tkazish uchun Farg'onaga etib kelishdi. Saytimiz muxbiri imkoniyatdan foydalanib jamoa murabbiylar shtabi vakili Aybek Nurboev bilan intervyu tashkilladi.

"Do'stlik-Oltiariq"ga qarshi o'yin haqida

- "Aral" jamoasi bosh murabbiyi bizning futbolimiz faxriysi Nematillo Quttiboev sanaladi. Hozirda u kishi sog'ligi bilan bog'liq muammolar tufayli Farg'onaga kela olmadi. Borib o'yin bo'lib o'tadigan stadion bilan tanishdik, uchrashuv oldidan mashg'ulot o'tkazdik. "Do'stlik-Oltiariq" yaxshi shakllangan jamoa, tarkibida kuchli futbolchilar jam bo'lgan. Oson o'yin bo'lmaydi, lekin biz har bir o'yinda faqat g'alaba uchun maydonga chiqamiz. Muxlislar qiziqarli va tomoshabop futbol ko'rishlariga hech shubha yo'q.

Jamoa maqsadlari

"Aral"ning maqsadi - mahalliy iqtidorli futbolchilardan iborat raqobatbardosh jamoa tuzish. Hozirda asosan yosh futbolchilarga etibor qaratayapmiz.

Klub rahbariyati va murabbiylar shtabi

Aytib o'tganimdek, jamoamiz bosh murabbiyi Nematillo Quttiboev. U kishiga yordamchi murabbiy sifatida o'zim ko'maklashib kelmoqdaman. "Nasaf"da va boshqa nomdor klublardagi yorqin o'yinlari bilan muxlislarga yaxshi tanish bo'lgan sobiq futbolchi Azamat Allaniyazov klub direktori lavozimida ish olib bormoqda. Klub matbuot xizmati va boshqa tashkiliy ishlar bo'yicha taniqli mutaxassis Aybek Aknazarov faoliyat olib boradi. Jamoamiz mahalliy byudjetdan moliyalashtiriladi.

Jamoa tarkibi haqida

Jamoamizda asosan o'tgan yilgi mavsumda 2-ligada to'p tepgan yoshlar o'ynab keladi. Ko'pchilik futbolchilarimizda hozir Birinchi liga tajribasi ham yo'q. Shunday bo'lsa-da, ular uchrashuvlarda har tomonlama o'zlarini ko'rsatib kelmoqdalar. Tarkibimizda taniqli va tajribali futbolchilar ham bor. Masalan Damir Nizanov, Shamsiddin Sagdullaev, Behruz Zaynitdinovlarni ko'rsatish mumkin. Jamoamizda o'rtacha yosh 21-22 yosh hisoblanadi.

Bekzod Tolibov yozib oldi

Aybek Nurboev: "Aral"ning maqsadi - mahalliy iqtidorli futbolchilardan raqobatbardosh jamoa tuzish"