Мисрлик журналист: "Ўзбекистонга қарши учрашув Африка Кубоги учун услубни синовдан ўтказиш имконияти дегани. Салоҳ Месси эмас"

– Миср терма жамоасининг турнирга бўлган муносабати қандай?

– Ўзбекистондек тартибли Осиё жамоасига қарши ўйин ўтказиш "фиръавнлар"нинг Африка Миллатлар кубогида қўллаши мумкин бўлган услубини синовдан ўтказиш имконияти сифатида қаралмоқда. Мазкур учрашув футболчиларга турнир бошланишидан олдин тактик босимларга мослашиш имкониятини беради.

Ҳоссам Ҳассан бошчилигидаги техник ходимлар ушбу учрашув орқали футболчиларнинг ҳам техник, ҳам жисмоний тайёргарлигини баҳолашни, шунингдек, расмий мусобақа муҳитига киришдан олдин асосий таркибнинг ўзаро уйғунлигини текширишни мақсад қилган.

Бундан ташқари, улар олдинги ўйинларда кўзга ташланган баъзи ҳимоявий ва ҳужумдаги хатоларни бартараф этишга, шу билан бирга жисмоний тайёргарлик даражасини яхшилаш ва жамоанинг уч чизиғи – ҳимоя, ярим ҳимоя ва ҳужум ўртасидаги ҳамкорликни кучайтиришга алоҳида эътибор қаратмоқда.

– Қайси асосий ўйинчилар йиғинга таклиф қилинмади?

– Миср терма жамоаси таркибига мураббий Ҳоссам Ҳасcан доимо таянадиган асосий футболчилар киритилган бўлиб, баъзи янги кучлар ҳам қўшилган. Рўйхатда кутилмаган ўзгаришлар кўзга ташланмади.

– Муҳаммад Салоҳ ва "Ливерпуль" сўнгги учрашувларда яхши натижа кўрсата олмаяпти. Бунинг сабаби нимада деб ўйлайсиз?

– Муҳаммад Салоҳнинг баъзи ўйинларида пасайиш кузатилиши табиий, чунки ҳеч бир футболчи ҳар бир ўйинда мукаммал даражада ўйнай олмайди ёки доимо аниқ пас бера олмайди – эҳтимол Месси бундан мустаснодир, лекин Салоҳ Месси эмас.

Гарчанд у Миср билан Африка Миллатлар кубогини қўлга кирита олмаган бўлса-да, хорижда эришган улкан ютуқлари туфайли биз ҳамон уни Миср футболи тарихидаги энг яхши футболчи деб ҳисоблаймиз.

Умуман олганда, мураббий Арне Слотнинг тактикаси ҳаммани ҳам ишонтира олмаяпти ва унинг қўл остида "Ливерпул"нинг ўйини аввалгидек даҳшатли эмас – Юрген Клопп даврида кўрсатилган қудрат сезилмаяпти.

Шундай бўлса-да, Салоҳнинг ўйин савияси сўнгги пайтларда оммавий ахборот воситалари ва матбуот тасвирлаганидек ёмон бўлиб кетгани йўқ.

– Ўзбекистон терма жамоасининг уч нафар футболчисини ажратиб кўрсата оласизми? Фикрингизча, уларнинг қай бири энг яхшиси ҳисобланади?

– Албатта, мен "Манчестер Сити" футболчиси Абдуқодир Ҳусанов ҳамда Элдор Шомуродовни яхши биламан.