Ўзбекистон миллий футзал терма жамоаси Бухородаги йиғинни давом эттирмоқда

Осиё кубоги–2026 мусобақасига тайёргарлик доирасида ташкил этилган ушбу йиғинда Нодир Элибоев бошчилигидаги мураббийлар штаби футболчиларнинг жисмоний ҳолатини янада яхшилаш, ўйинчилар ўртасидаги ўзаро боғланишларни мустаҳкамлаш ҳамда турли тактик ва стратегик йўналишлар бўйича машғулотлар олиб бормоқда. Юқоридаги суратларда кечаги машғулот жараёни акс этган.

Эслатиб ўтамиз, Бухородаги йиғин доирасида Ўзбекистон миллий терма жамоаси Россия терма жамоасига қарши иккита халқаро ўртоқлик учрашувини ўтказади. Россия терма жамоасининг бугун эрта тонгда Бухоро шаҳрига етиб келгани ҳақида аввалроқ хабар берган эдик.

Халқаро ўртоқлик учрашувларидан биринчиси 19-декабрь куни соат 17:00 да “Универсал” спорт мажмуасида бўлиб ўтади ва мухлислар учун очиқ тарзда ташкил этилади. Шу муносабат билан барча бухоролик футзал ишқибозларини ҳамда шаҳар меҳмонларини ушбу қизиқарли халқаро ўртоқлик учрашувини жонли томоша қилиш ва миллий терма жамоамизни қўллаб-қувватлаш учун “Универсал” спорт мажмуасига чорлаб қоламиз.

Спорт мажмуасига кириш мутлақо бепул.