"Реал" ТВ Лапортанинг Негрейрани танимаслиги ҳақидаги сўзларига жавобан: "Эслатиб ўтамиз, судда ёлғон гапириш – бу жиноят"

"Реал" клуб телевидениеси "Барселона" президенти Жоан Лапорта Хосе Мария Энрикес Негрейра иши бўйича кўрсатма бераётганда судда ёлғон гапирган бўлиши мумкинлигига ишора қилди.

Эслатиб ўтамиз, 2023 йилда "Барселона" ва унинг раҳбариятига Испания Қироллик футбол федерацияси (RFEF) Техник ҳакамлар қўмитаси (CTA) собиқ вице-президенти Хосе Мария Энрикес Негрейрага тўловлар амалга оширилгани юзасидан пора бериш айблови қўйилган эди. Суд 2001 йилдан 2018 йилгача бўлган даврда "Барселона" томонидан Негрейрага тўланган 7,7 миллион еврони жиноят деб ҳисоблаган.

"Барселона" президенти Жоан Лапорта судда Негрейра ва унинг ўғли билан шахсан таниш бўлмаганини айтди: "Менга ҳакамлик бўйича маслаҳатлар ҳақида айтишганди. 18 йил учун 7,3 миллион евро – фойдали хизматлар учун унчалик кўп эмас". Шунингдек, у қуйидагиларни таъкидлади: "Барса" мусобақа натижаларига таъсир ўтказмаган. Бу тарихимизнинг шонли даврини қоралаш учун режалаштирилган кампания".

"Эслатиб ўтамиз, судда ёлғон гапириш – бу жиноят", – деди "Real Madrid TV" бошловчиси Лапортанинг Негрейрани танимаслиги ҳақидаги сўзлари акс этган кадрлар фонида.