- Ўйин ҳақида фикрингиз?
- Қўқон жамоаси билан "Зомин"да ишлаган пайтим ҳам тўқнаш келгандик. Ўшанда Қўқонда 1:1 ўйнаганмиз. Бугун учрашув олдидан рақибни яхшилаб ўргандик. Берилган кўрсатмаларни футболчиларимиз тўлиқ бажаришди. Энг муҳими, яккакурашларнинг 80 фоизида устун келдик. Бу бизни жудаям хурсанд қилди.
Биз тарих яратдик, чунки футболчилар ҳали бу даражага чиқмаганди. Ташкил топганига ҳали бир йил бўлмаган "Ғазалкент" клубининг Ўзбекистон Кубоги чорак финалга чиқишини катта ютуқ деб ҳисоблайман. Клубимиз раҳбарияти Кубок ўйинларида қанча узоқ борсак шунча яхши деган. Ушбу ғалаба билан раҳбарларимизни, мухлисларни ва футболчиларимизни табриклайман.
- Ўйиндан олдин жамоангизда уч нафар йўқотиш бор эди: жамоа сардори дисквалификация қилинган, яна бир футболчингиз "қизил" олган ҳамда марказий ҳимоячи Рўзибоев Испанияда кўрикда бўлиб турибди. Ушбу йўқотишлар туфайли сизда қанчалик хавотир бор эди?
- Жамоамиз ҳали ёш ва олдимизга жиддий мақсад қўйилмаган. Мақсад - ёшларни тарбиялаш. Эртага биронта футболчимиз четга кетадими ё бошқа клубгами, ўрнини босадиган бошқалар бор. Бугун кўрдингиз, Суперлига клубига қарши йўқотишлар билан ўйнаган бўлсак-да, бошқа футболчиларимиз ўзларини кўрсата олишди. Яъни ҳеч кимнинг ҳеч кимдан кам жойи йўқ. Бу ҳам рақобат борлигидан. Бундан хурсандмиз. Четга кетган ўйинчиларимиз ўша ерда қолсин деймиз, бу ҳам терма жамоа ривожига ишлайди.
- "Қўқон-1912"нинг охирги учрашувларида Сильвенус Нимели фаоллиги билан ажралиб турганди. У бугун ҳам гол ура олди, аммо биринчи таймда ҳимоячиларингиз унга ҳеч қандай имкон қолдирмади.
- Биз рақиб футболчиларинг кучли томонларини билардик. Қўқон жамоаси юқорига чиққанда беш киши ҳужумга ўтади. Одатда уч нафар ҳимоячи билан ҳаракат қилади, бугун эса 4-4-2 схемасида ҳаракат қилишди. Нимелининг ўнг оёғи кучли, шу боис имкон берманглар деб айтдик.
- Лазизбек Мирзаев жамоангизда "мотор" вазифасини бажаряпти. Бу ўйинда ҳам "мотор" эканлигини исботлай олди. Лекин баъзи эпизодларда тўпни қизғангандек бўлди, яна бирга бир вазиятдан фойдалана олмади. Буни футболчи учун табиий ҳол деб ҳисоблайсизми?
- Кўрпани ўзига тортиш ҳаммага ҳам эмас. Мен Лазиз учун хурсандман. У биринчи даврани "Локомотив"да ўтказиб, кейин бизга қўшилди. Жамоамизда Лазиз кўзга жуда тез ташланади, нима учун? Чунки кўрпани ўзига тортишга ҳаракат қиляпти. Ортидан бошқаларни эргаштира билиш ҳам катта санъат.
Лазиз Мирзаев ҳам ўзи, ҳам жамоа учун хизмат қиляпти. Унинг гол уриш-урмаслиги иккинчи масала. Ҳаммаси вақтга боғлиқ, керак пайтда 10-15та гол уради ҳали. "Ғазалкент"даги ўйини Мирзаевнинг келгуси фаолиятига жуда катта туртки бўлади деб ўйлайман. У ярим ҳимояда ва ҳимояда ҳам ўйнаяпти. Кимдир чарчаб қолса бориб ўрнини тўлдиряпти. Бундан хурсандман.
