Вадим Абрамов: "Барча голларни қарши ҳужумлар туфайли ўтказиб юбордик, ўйин учун режамиз умуман бошқача эди"

- Биринчи бўлимда қўпол хатоларга йўл қўйдик. Иккинчи бўлимга чиқаётганда умид бордек кўринганди, аммо қизил карточка олдик. Четлатишдан сўнг жамоани жаҳли чиқди, 10 киши бўлиб яхши вазиятларга эга бўлдик. Бироқ тўп дарвозага кирмади. Барча голларни қарши ҳужумлар туфайли ўтказиб юбордик. Ўйинга режамиз умуман бошқача эди. Бир футболчимизда тўртинчи сариқ карточка, бошқасида қизил... Навбатдаги ўйин Жиззах жамоасига қарши - дея сўз бошлади мутахассис.

- Бугунги учрашувдаги марказий ҳимоячилар ўйини ҳақида қандай фикрдасиз?

- Биринчи таймдан сўнг уларни алмаштирдик. Қандай қилиб бундай хатоларга йўл қўйиш мумкин.

- "Динамо" Суперлигада кетма-кет 3 мағлубиятини қабул қилди. Бу омадсизликларга асосий сабаб нима?

- Жароҳатланган футболчилар кўп. Икки таянч ярим ҳимоячимиз марказий ҳимояда ўйнашмоқда. Икки бразилияликда шикастланиш бор. Захира етишмаяпти.

- Бу мавсум аввалгиларидан яхши ўтди деб ўйлайсизми?

- Икки хил таассурот бор. Мусобақада яхшироқ иштирок этишимиз, медаллар учун курашишимиз мумкин эди. Ёмон бошладик, кейин формага кириб олдик. Одатда жамоа Про лигадан чиқса уларнинг вазифаси Суперлигада жон сақлаш бўлади.

- Суперлига баҳсларида Анвар Хожимирзаев ўзини жуда яхши кўрсатяпти. Нега у миллий терма жамоага чақирилмаяпти?

- Бу саволни терма жамоа устозига бериш керак. Анвардан кўнглимиз тўқ, балки терма жамоада унинг позициясида яхшироқ ҳужумчи бордир ёки бошқа сабаб. Билмайман.