“Футбол — дунёдаги энг буюк умумий иштиёқ. У ҳеч бир инсонга ва ҳеч бир ташкилотга тегишли эмас. Мунозара пул ёки келишилган қарорларни қайта кўриб чиқиш ҳақида эмас, балки ўйин ва унинг раҳбарларининг ҳалоллиги ҳақида бормоқда. Футболга раҳбарлик қилиш бу шахсий мулк эмас. Гап ҳокимиятни ушлаб туриш ёки уни талаб қилишда ҳам эмас. Бу ушбу ваколатни ишончи билан топширган бутун футбол оиласига хизмат қилиш бурчидир.
ФИФАнинг яқинда ўз вице-президентлари ва 211 та аъзо ассоциациясига йўллаган хатида [Жаҳон чемпионатлари ҳуқуқларини хусусий инвесторларга сотиш мумкинлиги ҳақидаги таклиф] жараёнида хатоларга йўл қўйилгани тан олинган. Бу шунчаки мулоқотдаги узилиш деб тақдим этилмоқда, ваҳоланки, футбол аслида соғлом фикрлашдаги узилишнинг гувоҳи бўлди. Қисқа муддатларда, мазмунли маслаҳатлашувларсиз илгари сурилган ва аъзо ассоциациялар унинг шартларини атрофлича ўрганиб чиқишга улгурмасларидан олдин якуний муддатга босилган бу таклиф — тасодифий эътиборсизлик натижаси эмас, балки назоратни чеклашга қаратилган аниқ пухта режанинг оқибати.
Ҳисобдорлик бўлиши керак бўлган жойда — сукунат, очиқлик бўлиши керак бўлган жойда эса — бегоналашув ҳукмрон. Футболнинг кучи ҳар доим унинг бирдамлигида бўлган. Биз футболга бўйруқ беришга эмас, балки унга хизмат қилишга қаратилган бошқарув номидан ушбу бирдамликни ҳурмат қилишга чақирамиз”, – дейилади баёнотда.
УЕФА, ОФК ва КОНКАКАФ Жаҳон чемпионати ҳуқуқларини хусусий инвесторларга сотиш ташаббускори бўлган ФИФА раҳбари Жанни Инфантинонинг хатти-ҳаракатлари бўйича мустақил текширув ўтказишга чақирди.
28 июль куни ФИФА ташкилотнинг медиа ва тижорат ҳуқуқларини, жумладан, ЖЧ ҳуқуқларини топшириш ҳамда унинг тўртдан бир қисмини хусусий инвесторларга 4,2 миллиард долларга сотиш режалаштирилган янги тузилмага асос солиш ниятида эканини маълум қилганди. Бу таклифни УЕФА, КОНКАКАФ, ОФК ва КОНМЕБОЛ рад этди. Кейинчалик ФИФА раҳбари Жанни Инфантино ушбу лойиҳадан воз кечилганини эълон қилди.
