Шавкат Саидов: Тенг кечган учрашувда омадимиз чопди

Шавкат Саидов, “Металлург” ФК жамоа бошлиғи:  - Мусобақа жадвалида ёнма-ён бораётган жамоаларнинг баҳси ҳамиша муросасиз курашлар остида кечади. Зеро қайд этиладиган натижа жамоанинг кейинги мавқеини белгилаб бериши аниқ. Шу маънода биз ҳам ён қўшниларимиз – “Қизилқум” жамоасига қарши кечадиган ўйинга жиддий тайёргарлик кўргандик. Биринчи таймда иккила жамоанинг ҳам ўйини қовушмади. Чемпионатимизда юзага келган танаффус клубларнинг ўйинига таъсир ўтказмасдан қолмаганлиги сезилди. Аммо вақт ўтгани сари иккала жамоа ҳам ўз ўйинини топиб борди. Шу боисдан ҳам икки хил таймнинг шоҳиди бўлдик.

Иккинчи тайм мухлисларга манзур бўлди, деб ўйлайман. Жамоалар ҳужумкор футбол намойиш этишди. Ҳар иккала клубда гол киритиш имкониятлари бўлди. Тайм ўрталарида Жасур Ҳасанов дарвозабонимиз билан яккама якка чиққан пайтда, тўғриси омадимиз чопди. Суҳроб Султоновнинг ҳам вазиятни ўқий олганлигига тасанно. Бу эса футболчиларимизни ўйин охирида руҳлантириб юборди ва сўнгги дақиқада уюштириган шиддатли ҳужумимизда Зоҳид Абдуллаев муҳим голини киритди. Навоийликлар ҳақида фақат илиқ фикрларни билдиришим мумкин. Улар жуда яхши шаклланган жамоани барпо этишган. Шу йўнилишдаги изланишни давом эттираверишса яқин орада совринли ўринлар учун курашадиган клубга эга бўлишади. Уларга кейинги учрашувларда омад тилайман, дейди Шавкат Саидов.

"Металлург" матбуот хизмати