Ўйиндан кейин "Хоразм" бош мураббийи Сергей Токов матбуот анжуманида иштирок этди.
- Ўйин ҳақида фикрингиз?
- Тўғрисини айтиш керак, бундай майдонда тўп тепиш ёқимли бўлди. Стадиондаги муҳит ҳам ажойиб. Бир ой ичида бешинчи ўйинни ўтказдик ва ўйлашимча, барча жамоаларга осон бўлмаяпти. Бугун нимадир ўхшаб, нимадир ўхшамади. Биринчи таймда рақиб ҳимоясини бузишга ҳаракат қилдик, "Қизилқум" қарши ҳужумда ўйнади. Иккинчи таймда четлатиш рўй берди ва биз ҳимояга ўтиб қарши ҳужумларда ўйнай бошладик. Учрашувда гол кўрмадик ва натижа адолатли деб ўйлайман. Ғалаба қозониш учун кўпроқ олдинга ўтиш, ҳужум ташкил қилиш керак эди, лекин ҳар икки жамоага креативлик етишмади. Ўйинда курашлар, эмоциялар кўп бўлди, мухлисларга ёқди деб ўйлайман.
- Жамоангиз ёш бўлишига қарамай қўпол ўйин намойиш этди. Кўп бор тиббиёт вакиллари майдонга тушди. Бу нима билан боғлиқ?
- Футболчиларимизни қўпол демаган бўлардим. Фақат бугунги эмоция анча юқори бўлди, шунга бўлса керак. Ҳакам майдонда эди ва сиз айтгандек қўполликлар бўлганида жазосиз қолдирмасди. Ҳатто қизил карточкали вазиятни ҳам "қизил"га тортмайди деб ўйлайман. Янаям ҳакамларга бошқача кўрингандир. Футболда кураш бўлиши керак. Ўзбек футболининг муаммоси шундаки, биз футболчиларга курашишга кам берамиз. Буни жуда кам деб ўйлайман. Футболда ўйинчилар курашиши керак, бу мухлисларга ҳам ёқади. Агрессив футбол ҳаммага ёқади. Қаттиқ ўйин тез фикрлашга ва тез югуришга ўргатади. Бизнинг услубимиз эса бироз юмшоқ.
- Бугун бир очко қўлга киритдингизми ёки икки очко йўқотдингизми?
- Агар четлатишни ҳисобга олсак, бир очко қўлга киритдик деб ўйлайман. Лекин шунда ҳам гол уришимиз мумкин эди. Исмоилов бирга бир чиқиб фойдалана олмади. Ярим соат 10 киши бўлиб ҳимояланганимизни айтсак, бир очколи бўлдик деб ўйлайман.
- Ўйинлар оралиғи қисқа бўляпти, баъзилар тикланишга ҳам улгурмаяпти. Бу дегани жамоалар таркибими мукаммал эмасми?
- Бу ўринда мен иккита сабабни кўряпман. Биринчиси, биз бундай тиғиз тақвимга тайёр эмасмиз. Иккинчиси, аввалги турдан кейин уч нафар футболчимизни йўқотдик. Бизда захира ўриндиғи кенг эмас. Қолаверса сунъий майдонда уй учрашувларини ўтказяпмиз. Бу ҳам қийин бўляпти. Бугун уч нафар етакчи футболчимизсиз ўйнадик. Ёшларга имкон бердик. Менга жамоамиздаги ёшларнинг ҳаракати ёқяпти. Улар секин-аста рақобатни шакллантириб боради.
